Qostanaıda qalaaralyq avtobýstardyń qozǵalysy shekteledi

NUR-SULTAN. QazAqparat – Qostanaı oblysynyń bas sanıtar dárigeri karantındik shekteýlerdi kúsheıtetin jańa qaýly shyǵardy, dep habarlaıdy QazAqparat tilshisi.

Qujatta Ashyq júıesine qatyspaıtyn qalaaralyq, oblysaralyq turaqty avtobýstardyń qozǵalysyn toqtata turý kerektigi aıtylǵan. Al qala ishindeshi marshrýttyq avtobýstar jumys kúniniń qarbalas ýaqyttarynda meılinshe jıi qatynap, barlyq esikterin asha otyryp, tasymal júrgizýge minettelip otyr. Aptanyń demalys kúnderi saıajaıǵa qatynaıtyn avtobýstar ǵana jumys isteıdi.

Sondaı-aq, Ashyq jobasyna qatyspaıtyn kórme obektileri, karaoke, bılıard, kalıan, kompıýterlik klýbtar, túngi jáne oıyn klýbtary, boýlıng, batýttar, jabyq keshendegi balalardyń oıyn alańdary, attraktsıondardyń jumysyna tyıym salynady. Atalmysh sanattaǵy Ashyq jobasyna qatysatyn nysandar adam sanyn 30-dan asyrmaı, saǵat 12.00 men 20.00 arasynda jumys isteı alady.

Qaýly Ashyq jobasyna qatyspaıtyn mádenı nysandardyń báriniń jumysyna tyıym salady. Al Qurban aıt merekesin onlaın formatta ótkizý kerektigi aıtylǵan. Degenmen, dinı minájat oryndarynda bir adamǵa 4 sharshy metr oryn qamtamasyz ete otyryp, qulshylyq jasaýǵa ruqsat etilgen.

Jol boıyndaǵy tamaqtaný oryndarynda jazǵy alańdar 50 paıyz júktememen jumys isteı alady. Al Ashyq jobasyna qatysatyn bolsa, 50 paıyzdyq júktememen jáne adam sanyn 50-den sayrmaı saǵat 9.00 men 20.00 arasynda jumys isteı alady.

Azyq-túlikten basqa taýar satatyn oryndardyń jumysyna kelýshiler sanyn 30 adamnan asyrmaı, saǵat 18.00-ge deıin ruqsat beriledi. Al Ashyq jobasyna qatyspaıtyn aýdany 2000 sharshy metirden asatyn keshenderdiń jumysyna demalys kúnderi tyıym salynady.

Jańa qaýly boıynsha, bazarlardyń barlyq túri demalys jáne mereke kúnderi jumys istemeý kerek.

Qonaqúılermen týrıstik bazalar Ashyq jobasyna qatyspaıtyn bolsa, 80 paıyzdyq júktemeden asyrmaı kisi qabyldaı alady. Al Ashyq jobasyna qatysatyn bolsa, eshqandaı shekteý joq.

Saýnalar, SPA-salondar, termoparkter 50 paıyzdyq júktememen, ár adamǵa 5 sharshy metr oryn bóle otyryp, saǵat 20.00-ge deıin jumys isteı alady. Bul sanattaǵy nysandar Ashyq jobasynda tirkelmegen bolsa, demalys kúnderi jumys isteı almaıdy.

Qaýly basseınge barýshylardy bir kún buryn jazylýǵa mindettep otyr. Onyń ózinde r adamǵa 5 sharshy metr sý aıdyny bólinip, saǵat 20.00-ge deıin ǵana isteı alady. Ashyq jobasyna qatyspaıtyn basseınderge demalys jáne mereke kúnderi shekteý qoıylǵan.

Jabyq sport keshenderinde de 50 paıyz júktememen, ár adamǵa 5 sharshy metr oryn qaldyra otyryp, saǵat 20.00-deıin jumys isteýge ruqsat beriledi. Munda da Ashyq jobasyna qatyspaıtyn obektilerge demalys jáne mereke kúnderi shekteý qoıylǵan.

Qaýly 20 shildedegi saǵat 0.00-den bastap kúshine enedi. Qujattyń tolyq mazmunymen myna jerden tanysýǵa bolady.