Qostanaıda ındýstrııalyq aımaq ashyldy
Búgin oblys ákimi Arhımed Muhambetov mundaǵy lıft zaýytynyń qurylysymen tanysyp, keshenniń ákimshilik keńsesin ashty.
«Indýstrııalyq aımaqtyń negizgi maqsaty - jeke kásipkerlerdi qoldap, otandyq jáne sheteldik óndiris nysandarynyń jumys isteýine qolaıly jaǵdaı jasaý. Bul ónerkásip alańy sheteldik ınvestorlardyń qyzyǵýshylyq arttyrady dep oılaımyn. Olar osydan-aq oblys áleýetin jáne Úkimettiń qoldaýyn kóre alady. Bizdiń oblystyń geografııalyq ornalasýy kez kelgen kásipke qolaıly. Qazaqstannyń soltústik oblystary men Reseı Federatsııasynyń shekaralas aımaqtarynda 25 mln-ǵa jýyq halyq bar. Bul - úlken naryq. Árbir ónimge suranys joǵary. Sondyqtan bul isimiz óz jemisin beretinine senimdimin», - dedi Arhımed Muhambetov.
Budan soń óńir basshysynyń tóraǵalyǵymen Qostanaı oblysyndaǵy kásipkerlikti damytýǵa jáne ınvestıtsııa tartýǵa arnalǵan jıyn ótti. Májiliske kórshiles Reseıdiń «VEK» lıft zaýytynyń basshylary qatysty. Olar zaýyttyń keleshegin talqylady. Qurylys jumystary qarqyndy bastaldy. Joba quny - 900 mln teńge. Tseh jylyna 700-ge jýyq ónim shyǵarýǵa qaýqarly. Qazirdiń ózinde tapsyrystar qabyldap jatyr. Áýeli Qazaqstannyń ishki naryǵyn, keıin TMD kólemin qamtamasyz etýdi kózdeıdi.
«Biz ındýstrııalyq aımaqtyń 2 myń sharshy metr aýmaǵynda lıft shyǵaratyn zaýyt salamyz. Qazirgi ýaqytta qajetti jabdyqtardy alyp qoıdyq. Birlesken kásiporyndaǵy lıft óndirisinde Qazaqstan úlesi 60%-ǵa jetedi. Jańa joba tabysty jáne suranysqa ıe bolady. Bıznes jospar 5 jylǵa shaqtalǵan», - dep atap ótti reseılik «VEK» kásipornynyń dırektory Mıhaıl Molochnıkov.
Basqosýda Reseıden kelgen ınvestorlar óz oılaryn ortaǵa saldy. Olar aqsha quıýǵa yntaly. Aldaǵy jyldan bastap, naqty jobalar qolǵa alynbaq.
Bul aýmaqta jyl saıyn ártúrli óndiris oshaǵy ashylatyn bolady. Aldaǵy 5 jylda 10 kásiporyn turaqty jumys isteýi tıis.