Qostanaıda halyqaralyq dırıjerler forýmy ótip jatyr
Kúni keshe forým shymyldyǵyn oblystyq fılarmonııanyń kameralyq orkestri ashty. Abaıdyń 175 jyldyǵy men orys halyq aspaptar orkestriniń 35 jyldyǵyna arnalǵan halyqaralyq forým áli eki kún jalǵasady. Fılarmonııa sahnasynda álemniń áıgili kompozıtorlarynyń shyǵarmalary shyrqaldy. Sonymen qatar Reseıdiń eńbek sińirgen ártisi, Reseı Memlekettik akademııalyq Úlken teatrynyń (Máskeý) solısi, bas-barıton Pavel Chernyh «Kózimniń qarasy» ánin oryndap berdi.
Forýmda Abzal Muhıtdınov, Berik Batyrhan, Ashat Manaqbaev, Taras Myzın syndy mádenıet salasyna eńbegi sińgen dırıjerler óner kórsetti.
Qostanaı oblysy ákimdiginiń mádenıet basqarmasy basshysy Erlan Qalmaqov dırıjerler forýmynyń bastalýymen quttyqtap, Abzal Muhıtdınovke alǵys hat pen estelik syılyq tabystady.
«Úshinshi jyl qatarynan osynaý biregeı jobany ótkizip otyrmyz. Qostanaılyqtar álemdik deńgeıde tanymal jeti dırıjerdiń ónerin tamashalaýǵa múmkindik aldy. Bul kisilerdiń bizdiń óńirge kelýiniń ózi bir jańalyq. Fılarmonııamyzdyń qazaq jáne orys ult aspaptar orkestri, kameralyq orkestr repertýaryn tolyqtyrdy. Tyńdarman synynan ótken osyndaı mýzyka maıtalmandarymen tájirıbe almasyp, kásibı deńgeıde ósip, shyńdala túsedi», - dep atap ótti Erlan Qalmaqov.
Búgin qazaq halyq aspaptary orkestri kontserttik baǵdarlama usynsa, erteń orys halyq aspaptar orkestriniń mereıtoılyq kontserti ótpek.