Qostanaıda gaz qubyry órtenip, 45 adam evakýatsııalandy

QOSTANAI.QazAqparat – Qostanaı qalasynda gaz qubyrynan órt shyǵyp, birneshe adam evakýatsııalandy, dep habarlaıdy QazAqparat.

Oblystyq TJD baspasóz qyzmetiniń málimetinshe, oqıǵa 7 qazan kúni keshki saǵat 17:30 shamasynda bolǵan.

«Kezekshi bólimge Táýelsizdik kóshesindegi úıden órt shyqqany týraly habar tústi. Oqıǵa ornyna 3 tehnıka men 14 órt sóndirýshi jumyldyryldy. 3 qabatty turǵyn úıge tartylǵan gaz qubyry órtenip, ot úıdiń syrtyn sharpyǵan. Qutqarýshylar úıdiń 45 turǵyny evakýatsııalady. Onyń ishinde 13 bala bolǵan. Órt saǵat 17:53-te sóndirildi. Janý alańy 6 sharshy metrdi qurady. Zardap shekkender joq. Órttiń shyǵý sebebi anyqtalýda», delingen TJD habarlamasynda.

Qostanaı oblysynyń TJD azamattarǵa órt qaýipsizdigi erejelerin qatań saqtaýdy eskertedi.

Foto: 24.kz