Qostanaıda esirtki saýdalaǵan qylmystyq toptyń qalaı ustalǵany jarııalandy

QOSTANAI. QazAqparat – Qostanaı oblystyq polıtsııa departamentinde ótken brıfıng barysynda Qazaqstannyń ońtústik aımaqtarynan Qostanaı jáne Nur-Sultan qalalaryna esirtki jetkizý jáne saýdalaýmen aınalysqan qylmystyq toptyń qalaı ustalǵany aıtyldy, dep habarlaıdy QazAqparat.

Qostanaı polıtseıleri qylmyskerlerdi 22 naýryz kúni elimizdiń birneshe óńirinde ustady. Vedomstvo málimetinshe, jedel-izdeý sharalar keshenin ótkizý barysynda oblystyq PD esirtki qylmysyna qarsy kúres júrgizý basqarmasynyń qyzmetkerleri istiń basty kúdikti Denısov aýdanynyń 51 jastaǵy turǵynyn anyqtaǵan.

«Er adam 2021 jyldyń qańtarynda 8 adamnan quralǵan turaqty qylmystyq topty uıymdastyrdy. Esirtkini saýdalaý maqsatynda ol jergilikti bes turǵyndy tartty. Kóterme partııalardy Jambyl oblysy Shý aýdanynyń 67 jastaǵy turǵyny jetkizip otyrǵan, kýrer rólinde Nur-Sultan qalasynyń turǵyny boldy. Esirtkiniń kezekti partııasyn tasymaldaý kezinde kýrerden salmaǵy 5 keliden asqan gashısh salynǵan orama tárkilendi», - dep baıandady vedomstvodan.

Budan basqa, top uıymdastyrýshysynyń turǵylyqty jerinen prestelgen 26 tabletkasy, sondaı-aq aqsha men bank kartalary anyqtaldy.

«Top qatysýshylarynan alynǵan esirtki zattarynyń jalpy salmaǵy – 10 keliden astam gashısh men marıhýana. Polıtseılerdiń 7 toby qylmyskerlerdi bir ýaqytta Qostanaı, Jambyl oblystarynan jáne Nur-Sultan qalasynan ustady», - dedi polıtsııa departamentinen.

Oblystyq esirtki qylmysyna qarsy kúres júrgizý basqarmasynyń bastyǵy Asylbek Álmaǵambetovtiń aıtýyynsha, tártip saqshylary jyl basynan beri esirtkige qatysty 130-dan astam qylmys pen quqyqbuzýshylyqty anyqtady. Tárkilengen esirtkiniń jalpy salmaǵy 17 keliden asty.

Avtory Janna Musabaeva