Qostanaıda elden shyǵarý týraly sot sheshimin oryndamaǵan shetel azamaty ustaldy
Polisia.kz-tiń habarlaýynsha, jeltoqsan aıynyń basynda Qostanaı oblysynyń Tobyl qalasynda ótken «Ýchaske» jedel-aldyn alý is-sharasy barysynda elden shyǵarý týraly sot sheshimin oryndamaǵan Ózbekstan azamaty qolǵa túsken. Patrýldeý kezinde quqyq qorǵaý organdary qujattardy tekserý barysynda sheteldik azamattyń Qazaqstanda ýaqytsha turýǵa ruqsaty joq ekenin anyqtady. Bul derek polıtsııa qyzmetkerleriniń kúdigin týǵyzyp, azamatty mán-jaıdy anyqtaý úshin bólimshege jetkizýge negiz boldy.
Tekserý barysynda anyqtalǵandaı, atalǵan azamat 2023 jyldyń tamyz aıynda Astana qalasynyń mamandandyrylǵan aýdanaralyq sotynyń sheshimimen Qazaqstan aýmaǵynan shyǵarylǵan. Mundaı sheshim onyń Qazaqstan Respýblıkasynyń Ákimshilik quqyq buzýshylyq týraly kodeksiniń 517-babynda kózdelgen kóshi-qon zańnamasyn buzýyna baılanysty qabyldanǵan. Alaıda sot sheshimine qaramastan, azamat elden ketpeı, ishki ister organdarynan jasyrynǵan.
Qostanaı aýdandyq soty qoldanystaǵy zańnamaǵa sáıkes, atalǵan sheteldik azamatqa qatysty 30 táýlikke shekteýli júrip-turý sanktsııasyn bekitti. Qazirgi ýaqytta ol sot sheshiminiń oryndalýyn kútý úshin Qostanaı qalasyndaǵy arnaıy qabyldaǵyshqa ornalastyryldy. Astana qalasynyń polıtsııa qyzmetkerleri bul azamatty elden shyǵarý úderisin baqylaýǵa alyp, sot sheshiminiń tolyq oryndalýyn qamtamasyz etpek.
Quqyq qorǵaý organdary sheteldik azamattarǵa Qazaqstan aýmaǵynda kóshi-qon erejelerin qatań saqtaýdyń mańyzdylyǵyn eske salady. Zań buzylǵan jaǵdaıda quqyq buzýshylarǵa júrip-turý erkindigin shekteý, sondaı-aq elden májbúrli túrde shyǵaryp jiberý sııaqty ákimshilik sharalar qoldanylatyny aıtylady. Sonymen qatar sot sheshimimen elden shyǵarylǵan azamattar qosymsha sanktsııalar men saldarlarǵa tap bolmas úshin belgilengen merzimde Qazaqstan aýmaǵynan shyǵýy qajettigin esten shyǵarmaýy kerek.
Eske sala keteıik, buǵan deıin Qostanaıda paramen ustalǵan komıtet tóraǵasy 3 jyl 6 aıǵa sottalǵanyn jazǵan edik.