Qostanaıda dárigerlerge beriletin kóterme járdemaqy kólemi ulǵaıdy

ASTANA. QazAqparat – Qostanaı oblysynda densaýlyq saqtaý salasyna 105,2 mlrd teńge bólindi. Bul qarajat jańa nysandardy salýǵa, jabdyqtardy jańartýǵa jáne ózge aımaqtardan maman shaqyrýǵa jumsalady, dep habarlaıdy QazAqparat tilshisi.

«Oblysta densaýlyq saqtaýdy qarjylandyrý 22%-ke ósip, 105,2 mlrd teńgeni qurady. Máselen, 40 densaýlyq saqtaý obektisin jóndeý jumystaryna jáne materıaldyq-tehnıkalyq jaraqtandyrýǵa shamamen 10 mlrd teńge bólindi. Nátıjesinde medıtsınalyq jabdyqtarmen jasaqtaý 56%-ten 86%-ke deıin ósedi», - dedi óńir ákimi Q. Aqsaqalov Ortalyq kommýnıkatsııalar qyzmetinde ótken baspasóz máslıhatynda.

Ákimniń aıtýynsha, aldaǵy úsh jylda oblysta 27 densaýlyq saqtaý nysany salynady, onyń jeteýi bıyl salyndy.

«2023-2024 jyldary jyl saıyn keminde 100 dárigerdi tartý josparlanýda. Kelgen mamandardy turǵyn úımen qamtamasyz etý úshin páter men úı satyp alýǵa nemese salýǵa 2,1 mlrd teńge qarastyrylǵan. Bıyl dárigerler úshin oblystyq bıýdjet esebinen kóterme járdemaqy ulǵaıtyldy: qalada – 3,5 mln teńge, aýyldyq jerlerde – 5 mln teńge», - dep túsindirdi spıker.