Qostanaıda buzaqylar birneshe kóliktiń terezesin syndyryp, dońǵalaǵyn jaryp ketken

QOSTANAI.QazAqparat – Qostanaı qalasynda birneshe kóliktiń terezesin syndyryp, dońǵalaǵyn jaryp ketken buzaqylarǵa izdeý salyndy, dep habarlaıdy QazAqparat.

Oblystyq polıtsııa departamentiniń baspasóz qyzmeti taratqan aqparatqa súıensek, oqıǵa Altynsarın kóshesindegi turǵyn úıdiń aýlasynda bolǵan.

«Qostanaı qalasynyń polıtsııa basqarmasyna birneshe avtokóliktiń búlingeni týraly jergilikti turǵyndardan ótinish kelip tústi. Atalǵan fakti boıynsha jedel-tergeý toby oqıǵa ornynda tekserý júrgizip, jábirlenýshilerden jaýap aldy. Qazirgi ýaqytta osy qylmystyq quqyq buzýshylyqty ashýǵa baǵyttalǵan birqatar jedel-tergeý is-sharalary júrgizilýde», - deıdi vedomstvonyń baspasóz hatshysy Irına Bejenar.

Qostanaı oblysynyń polıtsııa departamenti turǵyndardan kólikterin mamandandyrylǵan turaqtarǵa qoıýdy suraıdy.