Qostanaıda blokpostaǵy saqshylarǵa kún saıyn tamaq pisirip aparǵan qarııa úzdik patrıot atandy
«Men patrıotpyn» baıqaýy aımaqta jyl saıyn ótkiziledi. Dástúrli jobanyń úzdikterin oblys ákiminiń orynbasary Marat Júndibaev quttyqtap, marapattaý rásimin júrgizdi. Oblystyq ishki saıasat basqarmasy muryndyq bolǵan baıqaýǵa bıyl júzdem astam úmitker qatysty.
Onyń ishinen túrli salada tabysty qyzmet etip, óńirdiń damýyna úles qosyp júrgen eńbegi eleýli 15 adam úzdik dep tanyldy. Olarǵa kádesyı retinde Memlekettik Eltańbanyń beınesi bar saǵat berildi.
«Barsha qostanaılyqtardy Memlekettik rámizder kúnimen quttyqtaımyn. Jyl saıyn ótetin «Men patrıotpyn» baıqaýynyń osy merekege oraılastyrylýynyń máni bar. Óıtkeni memlekettik rámizder – asqaq otansúıgishtiktiń nyshany. Baıqaý joǵary deńgeıde ótti. Bıyl on atalym boıynsha 15 jeńimpaz anyqtaldy. Jyl saıyn marapattaý rásimi patrıottar forýmy aıasynda ótetin. Bıyl oblystaǵy karantındik sharalardy saqtap, shaǵyn zalda uıymdastyryp otyrmyz. Biz búgin oblys ortalyǵyndaǵy 9 úzdikti marapattadyq. Qalǵan jeńimpazdarǵa aýdan-qalalardyń ákimderi syılyq tapsyrady», - dedi oblys ákiminiń orynbasary M.Júndibaev.
Sonymen, osy jyly mádenıet, ǵylym-bilim, densaýlyq saqtaý, sport jáne eriktiler qozǵalysynda eńbegi kóringen 103 qostanaılyq baıqaýǵa qatysýǵa ótinim bildirdi.
Marapat alǵandar qatarynda oblystyq balalar aýrýhanasynyń dárigeri Sanjar Jaǵyparov, volonter Irına Karpenko, bolashaq ǵalym Artem Slabýnov, polıtsııa qyzmetkerleri Janbolat Jaýtın jáne Amantaı Baıjanov jáne boksshy Nadejda Rıabets bar.
Tótenshe jaǵdaı kezinde alǵy shepte júrip, izgi isimen kópke úlgi bolǵan azamattardyń esimi eleýsiz qalmady. Olardyń qatarynda Jangeldın aýdanynyń Toqanaı aýylynda turatyn 70 jastaǵy Qamaı Qaparov bar. Qarııanyń aýyl mańyna qoıylǵan blokpostyń saqshylaryna kún saıyn úıinen tamaq ázirlep aparyp, qamqorlyq kórsetkeni beligili. Aqsaqal bul ónegesimen búkil eldiń súıispenshiligi men alǵysyna bólengen edi.
Erlik isimen kózge túsken tártip saqshylary da marapatqa ıe boldy. Olar – Qostanaı qalalyq polıtsııa basqarmasynyń qyzmetkerleri Janbolat Jaýtın men Amantaı Baıjanov. Qos polıtseı 22 sáýirde oblys ortalyǵyndaǵy Altynsarın kóshesinde kópqabatty úıdi sharpyǵan órtten 15 adamdy qutqaryp qalǵan. Batyrlar osy erlikteri úshin Іshki ister mınıstrinen medal aldy.
«Jerlesterimdi rámizder kúnimen shyn júrekten quttyqtaımyn. Eńbegimizdiń baǵalanǵany jaqsy. Búgin de oblys ákiminiń marapatyn alyp jatqanyma qýanyshtymyn. Elimizdiń týy kókte jelbireı bersin. Men polıtsııa qyzmetkerimin, sol sebepti eldiń tynyshtyǵyn kúzetýdi basty mindetimiz sanaımyz», – dedi aǵa leıtenant Janbolat Jaýtın.