Qostanaıda balalar kınofestıvali ótti
Mundaı shara elimizde osymen úshinshi ret uıymdastyrylyp otyr. Kıno festıvaliniń qatysýshylary buǵan deıin aýdan-qalalyq jáne oblystyq kezeńderde irikteýden ótken. Kórermenderge bas-aıaǵy 134 oqýshynyń týyndylary usynyldy.
«Balalar óz qııalyn qoıylymdar arqyly sheber sýretteı bilgen. Aıta ketetin jaıt, jasóspirimder kóbine ata-ana men bala arasyndaǵy qarym-qatynasqa, az qamtamasyz etilgen otbasydan shyqqan balalardyń turmys taýqymetine, jasóspirimderge arnalǵan gadjettiń áserine, dostyq, jalǵyzdyq taqyryptaryna erekshe nazar aýdarypty. Olar óz týyndylary arqyly ólketaný baǵyty boıynsha týǵan jerge úles qosýǵa umtylystary men sanany jańǵyrtýda ulttyq kodty basymdyqta ustanatynyn da baıqatty. Jas óskinniń bul baıqaý arqyly shyǵarmashylyq oı-qabileti damyp, kıno mádenıetine degen qyzyǵýshylyǵy artatyny sózsiz», - deıdi qazylar alqasynyń múshesi Shuǵa Qońqabaı.
Úmitkerler derekti fılm, áleýmettik jarnama, oıyndy kıno, vıdeo art-beınerolık, anımatsııa, mýzykalyq klıp, stop-motion-vıdeo, «Eralash», kınojýrnal syndy 9 janrda jumys tapsyrǵan. Erejege saı, qatysýshylar tsıfrly tehnologııalardyń kómegimen túsirilgen 3 mınýtqa deıingi qysqametrajdy fılmderin usyndy. QR BǴM respýblıkalyq qosymsha bilim berý, oqý-ádistemelik ortalyǵynyń sarapshysy Ásemgúl Nurlanova kıno festıvaldiń mańyzyna toqtaldy.
«Festıvaldiń negizgi maqsaty - balalardyń shyǵarmashylyq deńgeıin, olardyń tanymdyq keńistigin baıqaý. Bul jerde balalar jergilikti jerdegi túrli máselelerdi ekran arqyly jetkize bildi. Bir jaǵynan olar ózderine unaıtyn ispen aınalysyp, aınaladaǵy keıbir jaǵymsyzdyqtardan boılaryn aýlaq ustasa, ekinshiden, ónerdegi sheberlikterin shyńdaýǵa zor múmkindik aldy», - dedi ol.
Eki kúnge sozylǵan baıqaý qorytyndysyna oblystyq bilim basqarmasynyń basshysy Vasılıı Tsymbalıýk qatysyp, jeńimpazdar men júldegerlerdi marapattady. Jalpykomandalyq esepte birinshi oryndy Almaty qalasy, ekinshi oryndy Túrkistan oblysy, úshinshi oryndy Qostanaı oblysy ıelendi. Sondaı-aq, vıdeo-art-beınerolık, anımatsııa, mýzykalyq klıp, stop-motion-vıdeo, «Eralash», kınojýrnal nomınatsııalary boıynsha jeńimpazdar anyqtalyp, baǵaly syılyqtarmen marapattaldy.