Qostanaıda «Aýyl — el besigi» baǵdarlamasyna qansha qarajat bólingeni aıtyldy

<p>ASTANA. KAZINFORM — Qostanaı oblysynda «Aýyl — el besigi» baǵdarlamasy belsendi iske asyrylyp jatyr. Bul týraly Ulttyq ekonomıka mınıstrliginiń baspasóz qyzmeti málim etti.</p>

Ulttyq ekonomıka vıtse-mınıstri Baýyrjan Omarbekov Qostanaı oblysyna jumys saparymen baryp, Zarechnoe aýylynda boldy.

Sapar barysynda «Aýyl — el besigi» baǵdarlamasy sheńberinde aýylda salynǵan nysandarǵa erekshe nazar aýdaryldy. Olardyń ishinde dene múmkindikteri shekteýli balalardy ońaltýǵa jáne emdeýge arnalǵan sport kesheni men jabyq manej bar. 1,16 mlrd teńge somasynda iske asyrylǵan bul jobalar óńirdiń áleýmettik ınfraqurylymyn damytýǵa mańyzdy úles boldy.

— Jalpy, bıyl «Aýyl — el besigi» baǵdarlamasy sheńberinde kólik, ınjenerlik jáne áleýmettik ınfraqurylymdy salýǵa, kúrdeli jáne ortasha jóndeýge Qostanaı oblysyna 9,8 mlrd teńge bólindi, — delingen habarlamada.

Sodan keıin Ulttyq ekonomıka vıtse-mınıstri Baýyrjan Omarbekov «Aýyl amanaty» jobasy sheńberinde júzege asyrylǵan tigin tsehynyń qyzmetimen tanysty. Tobyl qalasyndaǵy bul joba quny 8,5 mln teńgeni qurady.

Qostanaı oblysyna jumys sapary kezinde Baýyrjan Omarbekov Tobyl qalasynyń turǵyndarymen kezdesti. Kezdesý kezinde ınfraqurylymdy jaqsartýǵa jáne áleýmettik máselelerdi sheshýge qatysty ózekti máseleler kóterildi.

Aıta keteıik, buǵan deıin Omarbekov «Aýyl - el besigi» baǵdarlamasy aıasynda 194 mlrd teńge somasyna 771 aýylda 1,8 myń joba iske asyrylǵanyn aıtqan edi.