Qostanaıda ań aýlaý alqaptary úshin konkýrs onlaın túrde ótkizilmek

QOSTANAI. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti memlekettik qyzmetterdi ońtaılandyrý jáne tsıfrlandyrýǵa kóshý týraly keńes ótkizdi, dep habarlaıdy QazAqparat.

Osy jyldyń sáýir aıynan bastap «Qostanaı - adaldyq alańy» jobalyq keńsesi jergilikti atqarýshy organdarmen birge memlekettik qyzmetter boıynsha saraptama jumystaryn júrgizedi. Bul jolǵy taldaý 3 salada júrgizildi. Olar - avtomobıl kóligi, sáýlet jáne qala qurylysy, tabıǵı resýrstar. Mamandar taldaý jasaýǵa 30 qyzmet túrin tańdap aldy.

«2019 jyldyń birinshi toqsanynda turǵyndarǵa 476 myń memlekettik qyzmet kórsetildi. Atalǵan salalardyń árqaısysynda memlekettik qyzmetterdi alý kezinde kemshilikter anyqtaldy. Sonyń biri - ınjenerlik jelilerge qosylý. Muny kásipkerler turaqty túrde kóterip, dabyl qaǵyp keledi. Bul máseleni sheshýge aýdan-qalalardyń ákimderi atsalysýy tıis», - dedi departamenttiń basqarma basshysy Gúlnar Shaǵyrova.

Jıynda konkýrs ótkizý jáne lımıtter men kvotalardy bólýdiń ashyqtyǵy týraly sóz boldy. Zań boıynsha, jeke nemese zańdy tulǵalar ózderine bekitip berilgen alqaptarda nemese sý aıdyndarynda ańshylyq nemese balyq sharýashylyqtaryn júrgizýge quqyly. Olar ruqsat qaǵazyn alý úshin tabıǵı resýrstar jáne tabıǵat paıdalanýdy retteý basqarmasyna júginýi tıis. Tıisinshe, alqaptardy bekitý týraly sheshim konkýrs qorytyndysy negizinde qabyldanady.

«Bul rette konkýrs eskirgen tásilmen ótkiziledi. Uıymdastyrýshylar qaǵaz konvertter arqyly daýystardy esepteıdi jáne salystyrmaly kestelerdi qolmen toltyrady. Bul durys emes. Aıtarlyqtaı ýaqyt jumsaýmen qatar, sybaılas jemqorlyq quqyq buzýshylyqtarynyń qaýpi baıqalady. Ańshy nemese balyqshylar tamyr-tanystary arqyly alqaptarǵa ıe bolýy múmkin. Búginde «elektrondyq memlekettik satyp alý», «E-mınfın» sııaqty zamanaýı platformalardyń baryn eske salamyz. Memlekettik mekemeler konkýrstardy onlaın ótkizýi kerek. Munyń bıýdjet qarajatyn tıimdi paıdalaný, protsestiń ashyqtyǵy, básekelestiktiń teń sharttary, qaǵaz qujat aınalymyn qysqartý, jınaqtalǵan aqparatqa jyldam qol jetkizý sııaqty múmkindikteri bar», - dedi G.Shaǵyrova.

Aqparattyq tehnologııalardy keńinen engizýge qaramastan, sý janýarlaryn aýlaýdy esepke alý áli kúnge deıin qaǵaz jýrnaldarda júrgiziletini aıtyldy.

Aıta keteıik, 2019 jyly memlekettik qyzmettiń 80% elektrondy formatqa aýysady.