Qostanaıda Ahmet Baıtursynulynyń 150 jyldyǵyna 3 mlrd teńgege jýyq qarajat bólindi

QOSTANAI. QazAqparat — Qostanaı oblysynyń ákimdigi Ahmet Baıtursynulynyń 150 jyldyǵyn merekeleý boıynsha oblystyq is-sharalar josparyn bekitti. Búginde Ahmet Baıtursynuly dúnıege kelgen Jangeldın aýdany turǵyndarynyń ómiri men áleýmettik jaǵdaıyn jaqsartý boıynsha aýqymdy ınfraqurylymdyq jobalar iske asyp jatyr. Ol jaıynda brıfıngte oblystyq mádenıet basqarmasynyń basshysy Erlan Qalmaqov aıtty, dep habarlaıdy QazAqparat tilshisi.

«Oblys ákimdigi jospar aıasynda Torǵaı aýylynda «Ahmet Baıtursynuly men Mirjaqyp Dýlatulynyń ádebı mýzeıine» reekspozıtsııa jáne jóndeý jumysyn júrgizip jatyr. Ol úshin bıýdjetten 170,5 mln teńge kóleminde qarajat bólindi. Aýdan ortalyǵynan A. Baıtursynuly aýylyna deıingi 41,4 km tasjolǵa jáne Torǵaı ózenindegi kópir jóndele bastady. Ol úshin respýblıkalyq jáne oblystyq bıýdjetten 2,7 mlrd teńge bólindi», - dedi E. Qalmaqov.

Osy jerde, Sarytúbek qonysy aýmaǵynda ornalasqan A.Baıtursynuly aýylynda jańa medıtsınalyq pýnkt salynyp, Aqkól aýyldyq ambýlatorııasy jóndelip, sondaı-aq medıtsınalyq jabdyqtar jańartylyp jatyr.

Oǵan oblystyq bıýdjetten 62 mln teńge baǵyttaldy.

«Sondaı-aq, A. Baıtursynuly dúnıege kelgen Sarytúbek qonysy Aqkól aýylynda «Ahmet Baıtursynulynyń mýzeı úıi» qurylysy josparlanǵan. Qazirgi ýaqytta jobalyq-smetalyq qujattama ázirlenip jatyr. Oblystyq bıýdjetten qosymsha qarajat berildi», - dedi vedomstvo basshysy.

Sondaı-aq, qazir basqarma demeýshilik qarajat esebinen Torǵaı aýylynda Ahmet Baıtursynuly men Mirjaqyp Dýlatovtyń qurmetine eskertkish ornatý máselesin qarastyryp jatyr.

Taıaý ýaqytta aýdandaǵy shalǵaı aýyldardy ınternetke qosý josparda bar.

Infraqurylym jobalaryn iske asyrýmen qatar, oblysta uly tulǵanyń rýhanı murasyn nasıhattaýǵa baǵyttalǵan mádenı-buqaralyq sharalar ótkiziledi: halyqaralyq ǵylymı-praktıkalyq konferentsııalar, ekspedıtsııalar, baıqaýlar men chellendjder jáne taǵy basqalar.

Alash kóshbasshysyna arnalǵan jańa spektaklder men teatrlandyrylǵan qoıylymdar qoıylady.

«Barlyq shara qarjylaı qamtylyp otyr. Jergilikti bıýdjet esebinen 2022-2023 oqý jylynyń túlekterine pedagogıkalyq jáne ınjenerlik-tehnıkalyq mamandyqtar boıynsha Ahmet Baıtursynuly atyndaǵy grant beriledi. Osy jyly bir jylda 750 myń teńgeden 10 grant», - dep túıindedi E. Qalmaqov.