Qostanaıda 7 aýyldyń ataýy ózgerdi

QOSTANAI. QazAqparat - Bıyl Qostanaıda 70-ten astam kósheniń ataýy ózgergen. Bul týraly óńirlik kommýnıkatsııalar qyzmetinde ótken brıfıngte málim boldy, dep habarlaıdy QazAqparat.

Oblystyq tilderdi damytý basqarmasy basshysynyń mindetin atqarýshy Qazymbek Ahmetovtiń aıtýynsha, bıyl oblysta 4 aýyldyń ataýy ózgerdi. Jaqynda ǵana Qostanaı qalasyndaǵy burynǵy Avıatsıonnaıa kóshesine Kámshat Dónenbaevanyń esimi berilse, Kazahskaıa kóshesi Ábilsaı bolyp ózgerdi. Arqalyq qalasyndaǵy №4 mektepke Keıki batyr esimi, Meńdiqara aýdanyndaǵy Borovskoı kásiptik-tehnıkalyq kolledjine Kámshat Dónenbaevanyń esimin berý týraly usynystardy respýblıkalyq onomastıka komıssııasy maquldady.

«2018 jyly óńirimizde 9 áleýmettik nysan, 3 aýyldyq okrýg, 4 aýyl, 73 kósheniń ataýy ózgertildi. Bul kórsetkishterge turǵyndar arasynda ótkizilgen túsindirý-aqparattyq jumystar arqyly qol jetti. Fedorov, Qarabalyq, Taran, Jitiqara aýdandarynda kóshe attaryn ózgertý kezinde kóptegen túsindirý jumystaryn júrgizdik. Naýryz aıynda Zatobol kentiniń mártebesi men ataýyn aýdandyq mańyzdaǵy Tobyl qalasyna ózgertý týraly usynysty kópshilik qoldady. Al jaqynda zııaly qaýym ókilderi men Taran aýdany jurtshylyǵynyń Elbasyna, oblys jáne aýdan basshylyǵyna joldaǵan jazbasha usynystaryna sáıkes, Taran aýdanyna Beıimbet Maılın esimin berý týraly birlesken otyrysy ótti», - deıdi Qazymbek Ahmetov.

Brıfıngte belgili bolǵandaı, aldaǵy ýaqyt jer-sý ataýlaryn qaıta qalpyna keltirýde QR Úkimeti janyndaǵy respýblıalyq onomastıka komıssııasynyń 2018 jylǵy 12 naýryzyndaǵy otyrysynda bekitilgen Qazaqstan tarıhyndaǵy jalpyulttyq deńgeıde tanymal 150 tulǵanyń esimi bar «Tarıhı tulǵalar», «Tarıhı oponımder jáne «Dástúrli ataýlar» tizimderi qatań basshylyqqa alynbaq.

Jıynda Taran aýdandyq máslıhaty turaqty komıssııasynyń tóraıymy, aýdandyq qoǵamdyq keńestiń tóraıymy Natalıa Rýdneva, «Nur Otan» partııasy Taran aýdandyq fılıaly tóraǵasynyń birinshi orynbasary, Qostanaı oblystyq máslıhatynyń depýtaty Aınash Dadanova, Taran aýyly jergilikti qaýymdastyǵy múshesi Gaýhar Asanovalar tilshilerdiń suraqtaryna jaýap berdi.

Eske salsaq, Taran aýdanyna Beıimbet Maılın esimin berý týraly másele 4-5 aı boıy respýblıkalyq onomastıkalyq komıssııasynda qaralady. 

 

Illıýstratsııalyq foto