Qostanaıda 300 júk kóliginiń júrgizýshisi jumyssyz qaldy

NUR-SULTAN. QazAqparat – Qostanaı oblysynda tapsyrystyń bolmaýynan bir top júk kóligi júrgizýshisi jumysynan aıryldy. Bul týraly Qazaqstannyń jıhaz jáne aǵash óńdeý ónerkásibi kásiporyndary qaýymdastyǵynyń prezıdenti Qanat Ibraev málim etti, dep habarlaıdy QazAqparat tilshisi.

«Bizdiń salanyń jumysyna aldymen pandemııa áserin tıgizdi. Onyń saldarynan jıhaz materıaldarynyń baǵasy ósti. Sáıkesinshe, jıhaz jasaý, satý básekesi kúrt azaıdy. Bıyl sala qyzmetine 2 jaǵdaı áser etti. Aldymen qańtardaǵy jappaı tártipsizdikter, odan keıin Reseı Federatsııasyna salynyp jatqan sanktsııalar. Óz kezeginde, Reseı jıhaz ǵana emes, birqatar sala boıynsha eksportty toqtatyp jatyr», - dedi Qanat Ibraev Nur-Sultan qalasy kásipkerler palatasynyń óńirlik keńesiniń eseptik kezdesýinde.

Onyń aıtýynsha, atalǵan másele elordaǵa ǵana emes, basqa da óńirlerge qatysty.

«Sonymen qatar qazir Reseı orman aǵashy eksportyna tyıym salyp jatyr. Bul bizdiń orta jáne shaǵyn bızneske tikeleı áser etedi. Onyń ishinde jıhaz jasaý salasy da bar. Ásirese, Reseımen shekaralas ShQO, Qostanaı oblystaryna aýyr soǵady. Mysaly, qazir Qostanaı oblysynda shamamen 300 júk kóliginiń júrgizýshisi jumyssyz qaldy. Biz máseleni sheshýdiń jolyn qarap jatyrmyz. Degenmen, bul bıznes emes, saıasat», - deıdi ol.

Buǵan deıin habarlaǵanymyzdaı, 400 myńnan astam astanalyq shaǵyn jáne orta bıznespen aınalysady.