Qostanaıda 1939 jyly latyn qarpinde shyqqan Abaı óleńderiniń jınaǵy tabyldy
Kitapty alǵash QR Іshki ister mınıstirligine qarasty Shyraqbek Qabylbaev atyndaǵy Qostanaı akademııasynyń qyzmetkeri Myrzabek Tuıǵanov jumys ornyna ákelip, áriptesterine tanystyrǵan.
«Qundy eńbek maǵan naǵashy atamnyń inisi, marqum Seremet Asyblekulynan mura bolyp qalǵan. Ol kisi kitapty kóp oqıtyn jáne sırek shyǵarylatyn shyǵarmalardy jıi jınaıtyn edi. Jas kezimde aýylǵa bir barǵanymda naǵashym osy latyn qaripinde jaryq kórgen Abaıdyń óleńder jınaǵyn syıǵa tartqan bolatyn. Sol ýaqyttan beri kitap meniń úıimde saqtalyp keldi. Bıyl Uly Abaıdyń týǵanyna 175 jyl, oǵan qosa Elbasy N.Á.Nazarbaevtyń bastamasymen elimizde latyn álipbıine kóshý jumystary júrgizilýde. Sondyqtan, kitapty úıde saqtaǵansha, onymen arnaıy til mamandary tanysyp, zerttesin degen nıetpen tanystyryp otyrmyn, - dedi kitap ıesi Myrzabek Tuıǵanov.
Kitaptyń alǵy sózin Sábıt Muqanov jazǵan. Qundy eńbekke uly aqynnyń óleńderimen qatar «Eskendir», «Ázim áńgimesi», «Masǵut» poemalary engen.
«Abaı óleńderi toptastyrylǵan kitap negizi eki tom bolyp jaryqqa shyqqan. Tabylǵan sonyń birinshi tomy. Ekinshi tomy 1940 jyly Muhtar Áýezovtiń alǵy sózimen jaryq kórgen eken. Kitaptyń syrtqy muqabasy tozǵan, alǵashqy betindegi alǵy sózderden birneshe bet jáne sońyndaǵy túsiniktemelerden birneshe bet joǵalǵan. Al qalǵan óleńder men poemalary tolyq saqtalǵan», - dedi Shyraqbek Qabylbaev atyndaǵy Qostanaı akademııasy kommýnıkatsııa bóliminiń basshysy Qurbanáli Ermuratov.
Myrzabek Tuıǵanov kitapty QR Іshki ister mınıstirligine qarasty Shyraqbek Qabylbaev atyndaǵy Qostanaı akademııasynyń murajaıyna tabystaǵan.
Aıta keteıik, akademııa murajaıynda buǵan deıin Muhtar Áýezovtyń dombyrasy, sonymen qatar Shyraqbek Qabylabevtyń jeke buıymdary men qoljazbalary saqtalǵan.