Qostanaıda 120 otbasyǵa páter kilti tapsyryldy
Astana kúni merekesinde páter kiltine ıe bolǵandardyń qýanyshyna oblys ákimi Arhımed Muhambetov ortaqtasty. «Áýejaı» shaǵyn aýdanyndaǵy №23-24, №25-26, №30-31 turǵyn úıler paıdalanýǵa berilip, 120 otbasy páter kiltine ıe boldy. Baspana qurylysy «Nurly jer» baǵdarlamasy aıasynda júzege asqan. Munda páter kezeginde turǵan memlekettik qyzmetkerler men halyqtyń áleýmettik turǵyda osal toptary ókilderi qonystanbaq. Saltanatty sharada turǵyndardy quttyqtaǵan oblys ákimi qýanysh ıelerine kópten kútken páter kiltin tabystady.
«Búgin, mine, úlken shattyqqa kenelip otyrmyz. Memleket basshysy usynǵan baǵdarlamanyń arqasynda turǵyndar baspanaǵa ıe boldy. Osy qarqynmen Qostanaıdy odan ári gúldendirip, keńeıte túsemiz. Qazirdiń ózinde «Bereke» shaǵyn aýdanyndaǵy turǵyn úı qurylysynyń jobalyq-smetalyq qujattary ázir. Jospar boıynsha bıyl «Áýejaı» móltek aýdanynda 47 páter qoldanysqa beriledi. «ıÝbıleınyı» shaǵyn aýdanynda 52 úı óz ıelerin kútedi», - dedi Arhımed Muhambetov.
Bul kúni baspanaly bolǵandardyń biri - Raýshan Súndetbaeva. Ol páter kezegine 15 jyl buryn tirkelgen. Qarııanyń jasy - 88-de. Ómirge 7 bala ákelgen Raýshan ájeıdiń aıtýynsha, ár balanyń óz nesibesi bar.
«Astana kúni merekesinde osyndaı shattyqqa ıe bolyp otyrmyz. Bizdiń otbasy úshin 2015 jyl da este qalady. Osy jyly nemerem Ásetti Elbasy úılený toıymen quttyqtap, úlken teledıdar syılaǵan edi. Ár balanyń óz nesibesi bolady. Mine, oblys ákimi tapsyrǵan búgingi páterde nemerelerimmen birge turamyz. Toqsanǵa taıaǵan adamǵa budan asqan baqyttyń keregi joq», - deıdi Raýshan Súndetbaeva.
Aıta keteıik, «Áýejaı» shaǵyn aýdanynda turǵyndardyń ıgiligine berilgen úılerdi «RSÝ-Sáýlet» kásiporny saldy. Jergilikti qurylys materıaldary paıdalanylǵan.