Qostanaıda 115 mln teńge jymqyrǵan alaıaq ustaldy
Qostanaılyq polıtseıler 115 mln teńge kólemindegi qarajatty jymqyrdy degen kúdikpen er adamdy ustady. Ol buryn sottalǵan oblys ortalyǵynyń 35 jastaǵy turǵyny bolyp shyqty.
Polıtsııaǵa Qostanaı qalasynyń turǵyny júgingen. Ol tanysynyń adamdy aldaý jáne senimge qııanat jasaý arqyly úlken somadaǵy aqshasyn ıemdengenin aıtty.
«Eki jyl buryn kúıeýim kolonııada jazasyn ótep jatqan edi. Birde jubaıym maǵan qońyraý shalyp, onyń óte jaqsy dosymen kezdesýim kerek ekenin, onyń sharýasy bar ekenin aıtty. Sol kúni kúıeýim áńgime qylǵan adam maǵan habarlasty. Biz bıznespen aınalysýdy sheshtik. Jubaıym oǵan qatty sengendikten, mende esh kúmán bolǵan joq. Sondyqtan men oǵan birden qolma – qol 1,3 mln teńge berdim», – deıdi 50 jastaǵy áıel.
Birneshe aıdan keıin jábirlenýshiniń jubaıy kolonııadan bosap, úıine keledi. Olar odan ári birlesken bıznesti júrgize bastady, shetelde kómir satýmen aınalysty.
Óz kezeginde, jábirlenýshi únemi otbasylyq qarajatty salyp otyrdy, birinshi jyly óziniń barlyq jınaqtaryn - 40 mln teńgesin berdi, al 2021 jyly páterdi satý arqyly taǵy 40 mln teńgesin qosty. Zalaldyń jalpy somasy 80 mln teńgeni qurady. Alaıaq Qostanaıdyń 35 jastaǵy turǵynyn da aldaǵan. Ol birlesken bıznes degen syltaýymen 35 mln teńgeni ıelengen.
«Eki jábirlenýshi osy jyldyń qyrkúıeginde polıtsııaǵa júgindi. Kúdikti jasyrynyp júrdi. Jedel-izdestirý is-sharalaryn júrgizý kezinde polıtseıler onyń ornalasqan jerin anyqtap, ustady. Qazirgi ýaqytta ol qamaýǵa alyndy», – deıdi Qostanaı qalasy Polıtsııa basqarmasynyń tergeýshisi Dáýlet Batyrhanov.
Qazirgi ýaqytta QR QK 190-baby 4-bóligi (Alaıaqtyq jasaý, ıaǵnı aldaý jáne senimdi teris paıdalaný jolymen asa iri mólsherde bótenniń múlkin urlaý) boıynsha er adam 10 jylǵa deıin bas bostandyǵynan aıyrylýy múmkin.
Foto:polisia.kz