Qostanaıda 1000-nan astam páter paıdalanýǵa beriledi

QOSTANAI. QazAqparat - «Turǵyn úı qurylys jınaq banki» kelesi jyly «Nurly jer» memlekettik baǵdarlamasymen salynǵan myńnan astam baspanany paıdalanýǵa beredi. 

Bul týraly oblystyq ákimdikte ótken jıynda atalǵan bank fılıalynyń dırektory Dáýren Saýdabaev málim etti, dep habarlaıdy QazAqparat.

Qostanaı oblysynda jyl basynan beri atalǵan bank jelisi boıynsha 14 turǵyn úı paıdalanýǵa berilgen. Bul nysandardyń barlyǵy «Nurly jer» memlekettik baǵdarlamasynyń aıasynda salyndy. Tıisinshe, barlyq turǵyn úıler bank salymshylary arasynda satyldy.

«Kelesi jyly memlekettik baǵdarlama boıynsha qoljetimdi baspana sanyn arttyramyz. Qostanaıda jalpy aýmaǵy 70 myń sharshy metr bolatyn myńnan asa páterdiń qurylysy josparlanǵan. Qazir tutynýshylar bazasy kóbeıip keledi. Ótken 11 aıda 12 myń depozıttik kelisim jasaldy. Jalpy oblys boıynsha 45 myń salymshymyz bar», - dep málimdedi Saýdabaev.

Onyń sózinshe, qazir 2 bólmeli páterlerge suranys kóp.  Páterlerdiń baǵasy 1 sharshy metrine 148 000- 153 000 teńge aralyǵynda. Taǵy bir artyqshylyq, salymshylar endi baspana.kz portaly arqyly qalaǵan páterin ózderi tańdaı alady.