Qostanaıda 10 zamanaýı mektep salynady
«Bıyl bilim berý salasyn qarjylandyrý kólemi 16,8%-ke ósti jáne 176,5 mlrd teńgeni qurady. Jyl sońyna deıin 3 mekteptiń qurylysy aıaqtalady, Al 2025 jylǵa deıin Qostanaı, Arqalyq, Rýdnyı qalalarynda, Áýlıekól, Qarabalyq aýdandarynda 10 zamanaýı mektep salý josparlanýda, onyń 8-i «Jaıly mektep» jobasy sheńberinde júrgiziledi», - dedi Q. Aqsaqalov Ortalyq kommýnıkatsııalar qyzmetinde ótken baspasóz máslıhatynda.
Ákimniń aıtýynsha, bul sharalar oqýshy oryndarynyń tapshylyǵyn shamamen 12 myńǵa azaıtýǵa múmkindik beredi.
«Qostanaı qalasynda zamanaýı Smart-ortalyq qurylysy jalǵasýda, onda 1 300 oqýshy ǵylymı jáne tehnıkalyq salada óz qabiletterin damyta alady. Munda robototehnıka jáne baǵdarlamalaý kabınetteri, kıbersport zaly, landshafttyq dızaın stýdııasy, kóptegen zerthanalar jumys isteıdi. Budan basqa, 142 bilim berý nysany jóndeledi, osy maqsattarǵa 5,8 mlrd teńge qarastyrylǵan.
Biz úshin bilimmen qatar, oqýshylardyń qaýipsizdigin qamtamasyz etý basty nazarda. Barlyq bilim berý nysandary beınebaqylaý kameralarymen (100%), lıtsenzııalanǵan kúzetpen (100%) jáne dabyl túımelerimen (100%) jabdyqtalǵan», - dep tolyqtyrdy Qumar Aqsaqalov.