Qostanaı jylý energetıkalyq kompanııasyna 15 mln teńgege jýyq aıyppul salyndy
Qala turǵyndarynyń ujymdyq shaǵymdary negizinde Tabıǵı monopolııalardy retteý komıtetiniń Qostanaı oblysy boıynsha departamenti ótken jyly «Qostanaı Jylý energetıkalyq kompanııasy» MKK-ge jylýmen jabdyqtaý qyzmetteri úshin aqy esepteýdiń zańdylyǵy boıynsha jospardan tys tekserýler júrgizgen. Osy tekserýlerdiń nátıjeleri boıynsha, TMRKD barlyq mekenjaılar boıynsha (Toqymashylar kóshesi, 9a úı, Pýshkın kóshesi, 183 úı, 8-shaǵyn aýdan, 22 úı) naqty jetkizilgen jylý energııasyn bólýde zań buzýshylyqtardy anyqtady. Bul tólemniń durys eseptelmeýine ákep soqtyrǵan.
Osyǵan baılanysty, «Qostanaı Jylý energetıkalyq kompanııasy» MKK-ge qatysty Ákimshilik quqyq buzyshýlyq týraly kodekstiń 164-baby 4-bóligi boıynsha 3 ákimshilik is qozǵaldy. Sondaı-aq, turǵyndarǵa jylýmen jabdyqtaý qyzmetteri úshin negizsiz eseptelgen soma mólsherinde qaıta esepteý júrgizýdi talap etetin nusqamalar berildi.
Qostanaı qalasynyń Ákimshilik quqyq buzýshylyq jónindegi mamandandyrylǵan soty 2022 jylǵy 18 sáýirde osy tabıǵı monopolııa sýbektisine jalpy somasy 14 702 400 teńgege aıyppul salý týraly qaýly shyǵardy. Alaıda, kompanııa shaǵymy boıynsha isti qaıta qaraý nátıjesinde Qostanaı oblystyq soty qaýlynyń kúshin joıyp, is júrgizý toqtatylǵan.
Qostanaı oblystyq sotynyń qaýlysymen kelispeı, TMRKD kassatsııalyq shaǵym joldady. Ony qaraý qorytyndysy boıynsha Joǵarǵy sottyń qylmystyq ister jónindegi sot alqasynyń 2023 jylǵy 3 naýryzdaǵy №6kp-14/23 qaýlysymen Qostanaı oblystyq sotynyń qylmystyq ister jónindegi sot alqasynyń 2022 jylǵy 8 tamyzdaǵy qaýlysynyń kúshi joıyldy, al Ákimshilik quqyq buzýshylyq jónindegi mamandandyrylǵan sottyń qaýlysy ózgerissiz qaldy.
Osylaısha, Qostanaı qalasynyń turǵyndaryna (kórsetilgen mekenjaılar boıynsha) jylýmen jabdyqtaý qyzmetteri úshin negizsiz eseptelgen somalar mólsherinde qaıta esepteý júrgiziletin boldy.