Qostanaı ýnıversıteti janynan tórt jataqhana salynbaq

QOSTANAI QazAqparat - Bıyl Qostanaı memlekettik pedagogıkalyq ýnıversıteti 344 oryndyq 4 jataqhana salýdy bastaıdy. Bul týraly QMPÝ rektory, professor Erkin Ábil óńirlik kommýnıkatsııalar qyzmetinde ótken jıynda baıandap berdi, dep habarlaıdy QazAqparat.

«Aldaǵy 4 jyldyń ishinde biz 344 oryndy 4 jataqhanada salýdy josparlap otyrmyz. Sonyń alǵashqysy 86 oryndyq úsh qabatty baspana aldaǵy kúzge qaraı paıdalanýǵa beriledi. Qazirgi tańda ǵımarattardyń orny belgilengen, jobalyq-smetalyq qujattary ázirlený ústinde.  Jataqhanalar oqý orny mańynan salynady. Ákimdiktiń kelisimin aldyq. Nátıjesinde, úsh qabatty tórt jataqhana kampýs-qalashyqqa aınalady», - dedi E.Ábil.

Rektordyń sózinshe, Bilim jáne ǵylym mınıstrliginiń ókilderi jataqhananyń sanıtarlyq jáne qurylys talaptaryna saı kelýin qamtamasyz etip otyrady. Máselen, kóptegen shet elderdegi jataqhanalarda bir stýdentke 3-4 sharshy metr aýmaq bólinedi.

Sondaı-aq, aqyly bólimde oqıtyn stýdentter úshin oqý baǵasynda ózgeris bolmaıdy. Al ýnıversıtet ǵımarat ústindegi mańdaısha jazýynyń qazaq tilindegi nusqasyn latyn álipbıimen jasaýdy uıǵaryp otyr. Sonymen qatar, Qostanaı memlekettik pedagogıkalyq ýnıversıtetine akademık Ómirzaq Sultanǵazın esimin berý týraly másele el ishinde jıi kóterilip júr.

«Bul usynys osydan bir jarym jyl buryn aıtyldy. Bastamashyl top tıisti organǵa hat jazdy. Endi ýnıversıtet mártebesin alyp otyrǵan soń, osy máseleni ári qaraı taǵy kóteretin bolamyz. Bizdiń tańdaýymyz akademık Ómirzaq Sultanǵazınge túsip otyr», - dedi Erkin Ábil.

Aıta keteıik, búgin Qostanaı memlekettik pedagogıkalyq ınstıtýty ýnıversıtet mártebesine ıe boldy.