Qostanaı turǵyny tergeý ızolıatoryna tapansha oqtaryn kirgizbek bolǵan

QOSTANAI.QazAqparat – Qostanaı oblysynda tergeý ızolıatorlarynyń birine tapansha oqtaryn jasyryp kirgizbek bolǵan adam ustaldy, dep habarlaıdy QazAqparat oblystyq Qylmystyq-atqarý júıesi departamentiniń baspasóz qyzmetine silteme jasap.

«ÝK-161/1 mekemesiniń baqylaý-ótkizý pýnktinde rentgen-teledıdar qondyrǵysynan tekserýden ótken kezde azamat B.-nyń bas kıiminen kúdikti zat tabyldy. Qyzmetkerler oǵan bas kıimin sheship, tekserýden ótýin usyndy. Tergeý ızolıatorlarynyń tekserý toby bas kıimniń kúnqaǵarynan jasyryn qalta tapty. Qalta ishinen Makarov tapanshasynyń 4 jaýyngerlik patrony alyndy», - delingen vedomstvonyń aqparatynda.

Tergeý ızolıatoryna oq alyp ótpek bolǵan turǵynnyń aıtýynsha, bas kıimdi «qoldan» satyp alǵan. Onyń ishindegi tapansha oǵynyń bary týraly bilmegen.

Qazirgi ýaqytta quqyq buzýshy protsessýaldyq sheshimdi kútýde. Onyń kinási dáleldense, 10 AEK kóleminde aıyppul nemese eskertý jazasyn alady.

ÝK-161/1 mekemesiniń baqylaý-ótkizý pýnkti arqyly ótetin barlyq azamattarǵa saqtaýǵa jáne paıdalanýǵa ruqsat etilmegen zattardy kirgizgeni úshin jaýapqa tartylatyny eskertiledi.