Qostanaı turǵyny Qazaqstan halqynyń namysyna tıetin vıdeo úshin sottalýy múmkin

QOSTANAI. QazAqparat – Qostanaı oblysynda ultaralyq arazdyqty qozdyrǵan Rýdnyı turǵynyna qatysty qylmystyq is qozǵaldy, dep habarlaıdy QazAqparat.

Oblystyq Polıtsııa departamenti baspasóz qyzmetiniń málimetinshe, áleýmettik jeli arqyly taraǵan vıdeo tekserilip jatyr. Rýdnyı turǵyny ýkraınalyq blogermen bolǵan áńgime barysynda Qazaqstan Respýblıkasynyń memlekettik tilin, jerin qorlap, qazaq halqynyń ar-namysyna tıetin sózder aıtqan. Keıinirek áleýmettik jelide onyń aty-jóni men mekenjaıy týraly málimet tarap ketti.

«Áleýmettik jelige monıtorıng júrgizý barysynda polıtseıler YouTube arnasynan atalmysh vıdeony anyqtap, shuǵyl tekseris júrgizdi. Qazir kúdiktiniń tulǵasy anyqtalyp, tergeý sharalary bastaldy. Kúdikti 7 jylǵa deıin bas bostandyǵynan aıyrylýy múmkin», - dep málimdedi Qostanaı oblysynyń polıtsııa departamenti.

Aıta keteıik, kúdikti kóp uzamaı vıdeo arqyly keshirim surady.