Qostanaı shekara otrıadyndaǵy qyzmettik ıt esirtki alyp ótpek bolǵandy ustap berdi

ASTANA. QazAqparat - Qostanaı shekara otrıadynyń «Qaıraq avto» shekaralyq-kóliktik baqylaý bólimshesinde jańa jyldyń aldynda, ıaǵnı 31 jeltoqsan kúni saǵat 16.10-da «Rýdnyı - Chelıabınsk» baǵytymen ketip bara jatqan jolaýshylar avtobýsyn tekserý barysynda, shekarashylar Aleksandr esimdi 22 jastaǵy Qazaqstan azamatyn ustady, dep habarlady QR UQK ShQ baspasóz qyzmetinen.

Arnaıy úıretilgen «Kan» atty qyzmettik ıt bul azamatty «esirtki tasymaldaýshy» retinde kórsetti. Shyndyǵynda da ustalǵan azamatty jeke tekserý nátıjesinde onyń kúrteshesiniń oń jaq ishki qaltasynan salmaǵy 8-10 gramm bolatyn «marıhýana» esirtkisi tabyldy. Aıǵaqtyq zattar ıesimen birge Qarabalyq aýdandyq ishki ister bólimine tapsyryldy.