Qostanaı polıtseıleri mıtıngiler týraly jańa zańnamamen tanysty
Qostanaı oblysy bastyǵynyń mindetin atqarýshy Nyǵmet Ismaǵulov tártip saqshylaryna «Qazaqstan Respýblıkasynda beıbit jınalystar uıymdastyrý jáne ótkizý tártibi týraly» jańa zańnyń talaptaryn túsindirdi.
«2020 jyldyń 25 mamyrynda Prezıdent Qasym-Jomart Toqaev beıbit jınalystar uıymdastyrý jáne ótkizý tártibi týraly Zańǵa qol qoıdy. Qabyldanǵan jańa Zań 6 maýsymda kúshine enedi.
Polıtseılerdiń basty mindeti – qoǵamdyq tártipti saqtaýdy qamtamasyz etý. Polıtsııa qyzmetkerleri úshin azamattardyń konstıtýtsııalyq quqyqtaryn saqtaý mańyzdy. Mıtıngke qatysýshylar tarapynan túrli quqyq buzýshylyqtarǵa jol bermeý qajet, is-sharalar zań normalaryna sáıkes júrgizilýi tıis», - dep atap ótti N. Ismaǵulov.
Sonymen, qoǵamdyq tártip buzylmasa jáne azamattardyń tynyshtyǵyna kedergi keltirmese, mıtıngterge jol beriledi. Jınalysty ótkizý úshin uıymdastyrýshylar jergilikti atqarýshy organǵa ótinish berýi qajet. Bul rette beıbit jınalystar arnaıy oryndarda ótkizilýi tıis.
«Mıtıngke qatysýshylarǵa halyqty Konstıtýtsııa men zańdardy buzýǵa shaqyrýǵa, jappaı tártipsizdik pen zorlyq-zombylyqqa shaqyrýǵa tyıym salynady. Alaýyzdyq otyn tutatýǵa, bılikti basyp alýǵa shaqyrýǵa, kóliktiń nemese azamattardyń qozǵalysyna kedergi jasaýǵa bolmaıdy», - dep eske saldy polıtsııa polkovnıgi.
Qoǵamdyq tártipti saqtaý boıynsha Memlekettik organdardyń jumysyna kedergi keltirýge, kıiz úıler men shatyrlar ornatýǵa da ruqsat joq. Mıtıngke qatysýshylarǵa ózimen sýyq qarýǵa jáne alkogoldi ishimdikter alyp júrýge tyıym salynǵan. N.Ismaǵulov atap ótkendeı, elimizde karantın áli saqtalady. Karantın kezeńinde elde buqaralyq is-sharalardy, onyń ishinde mıtıngilerdi ótkizýge shekteý qoıylǵan.