Qostanaı oblysynyń úsh eldi mekenine tabıǵı gaz tartylady

QOSTANAI. QazAqparat – Qostanaı oblysyndaǵy eldi mekenderdi gazdandyrýǵa 3,32 mlrd teńge qarajat bólinedi, dep habarlaıdy QazAqparat oblys ákiminiń baspasóz qyzmetine silteme jasap.

Qostanaı oblysynda shalǵaı eldi mekenderge aýyz sý jetkizý, gaz tartý, jol salý sekildi máseleler kezeń-kezeńimen sheshimin taýyp keledi. Onyń ishinde aýyldardy gazdandyrý baǵytyndaǵy bastamalar nátıjesi qýantady. Sońǵy tórt jyl kóleminde júrgizilgen gazdandyrý jumystarynyń arqasynda 179390 shańyraqqa kógildir otyn jetken. Oblys ákimdigi men «QazTransGaz Aımaq» AQ Qostanaı óndiristik fılıaly arasynda «Gaz taratý júıelerin tartý, tehnıkalyq jabdyqtaý» memorandýmy jasalǵan. Kelissóz sheńberinde 2016-2020 jyldar aralyǵynda oblystyń eldi mekenderin gazdandyrýǵa 13,4 mlrd teńge jumsaldy.

«Eldi mekenderdi gazdandyrýǵa bıyl 3,32 mlrd teńge qarajat bólý josparlanǵan. «QazTransGaz Aımaq» AQ bul qarjyǵa úsh iri jobany júzege asyrady. Atap aıtqanda, B.Maılın aýdanyna qarasty Tobyl kenti, Jitiqara qalasynyń shyǵys bóligi jáne Altynsarın aýdanyna qarasty Úlken Chýrakov aýylyn gazben jabdyqtaý jumystary qolǵa alynady. Osy jobalardy júzege asyrýdyń nátıjesinde oblys kólemindegi tabıǵı gaz tutynýshylarynyń sany 183200-ge deıin artady», - delingen oblys ákimdiginiń baspasóz habarlamasynda.

Aımaq ákimi Arhımed Muhambetov «QazTransGaz Aımaq» AQ Qostanaı óndiristik fılıaly men tıisti departamentterdiń basshylaryna jumystardy sapaly ári ýaqytyly júrgizýdi tapsyrdy.