Qostanaı oblysynyń turǵyn esirtki satqany úshin 7 jylǵa sottaldy

NUR-SULTAN. QazAqparat – Esirtki satýmen aınalysqan óostnalaıqy turǵyn 7 jylǵa sottaldy, dep habarlaıdy QazAqparat tilshisi.

Bul týraly Kóliktegi polıtsııa departamentiniń baspasóz qyzmeti aqparat taratty.

Qostanaı stantsııasyndaǵy jelilik polıtsııa bóliminiń qyzmetkerleri Qusmuryn kentinde esirtki zattaryn taratqan 48 jastaǵy er adamdy ustaǵan.

Kóliktegi polıtsııa departamenti bastyǵynyń orynbasary Nurjan Álibaevtyń aıtýyna qaraǵanda, tintý kezinde ol jatqan bólmeden 2,8 gramm gashısh, 3,58 gramm keptirilgen marıhýana tabylǵan. Sondaı-aq jylytý qazandyǵynyń qýysynan jalpy salmaǵy 337,88 gramm bolatyn marıhýana túıilgen bes túıinshek alynǵan.

«Atalǵan fakt boıynsha kólik polıtseıleri QR Qylmystyq kodeksi 297-babynyń 2-bóligi (iri mólsherde esirtki zattaryn ótkizý) boıynsha sotqa deıingi tergeý júrgizdi. Sotqa deıingi tergeý barysynda ustalǵan azamattyń esirtki zattaryn saqtaý men satýdaǵy kinási tolyq dáleldendi», - deıdi Nurjan Álibaev.

Onyń aıtýynsha, Qostanaı oblysynyń qylmystyq ister jónindegi mamandandyrylǵan aýdanaralyq soty kúdiktini kináli dep tanyp, 7 jylǵa bas bostandyǵynan aıyrý jazasyn taǵaıyndaǵan.