Qostanaı oblysynyń sý tasqyny kezeńine daıyndyǵyn TJD qyzmetkerleri tekserdi

QOSTANAI. QazAqparat – Qostanaı oblysynda kóktemgi sý tasqynyna daıyndyq máselesi «Kóktem-2021» oqý-jattyǵýynda tekserildi, dep habarlaıdy QazAqparat tilshisi.

Oblystyq TJD baspasóz qyzmetiniń habarlaýynsha, atalmysh is-shara oblystyń barlyq aýdanynda 4-5 naýryz kúnderi júrgizildi. Onyń negizgi maqsaty – azamattyq qorǵanys júıesi basqarý organdarynyń daıyndyǵy boıynsha kúshteri men quraldardyń sý tasqyny kezindegi TJ qaterine qarsy áreket etý qabiletin tekserý.

«Oqý-jattyǵý barysynda oblystyq qyzmetterdiń, qala jáne aýdan ákimshilikterniń sý tasqyny kezine daıyndyǵy tekserildi. Aımaqta, qalalar men aýdandarda respýblıkalyq jáne oblystyq shtab baǵyttaǵan nusqaýdy oryndaý boıynsha 20 arnaıy taktıkalyq oqý-jattyǵý ótkizildi», - dep habarlady bólimsheden.

Sonymen qatar shara barysynda aryqtardy, sý ótkizetin qurylystardy, qubyrlardy tazartý men eldi mekenderden qardy shyǵarý boıynsha jumys júrgizildi.

Sý tasqyny kezeńine qalalar men aýdandarda barlyǵy 162 tonna janarmaı, 9 myń tonna ınertti materıal, 53 myń qap daıyndaldy. Azyq-túlikti jetkizý týraly kelisimshart jobasy qarastyrylǵan. Kerek jaǵdaıda adamdardy ornalastyratyn jáne úı janýarlaryn jetkizetin jerler anyqtaldy.

Odan bólek, 2 960 adam, 1 085 tehnıka jáne 116 júzý quralynan, 365 sý sorǵysynan (olardyń 269-y – sý aıdaıtyn qurylǵy) turatyn oblystyq top jasaqtaldy.

Jalpy, TJD aqparatynsha, Qostanaı oblysy sý tasqynyna ázir.

Esterińizge sala keteıik, buryn Qostanaı oblysyndaǵy 95 eldi mekende sý basýy múmkin ekendigi habarlanǵan bolatyn.