Qostanaı oblysynyń sý qoımalarynda muz jaryp jatyr

QOSTANAI. QazAqparat - Tótenshe jaǵdaılar departamenti Qostanaı oblysynyń ózenderinde jáne jasandy sý qoımalarynda muz keptelisiniń aldyn alý úshin jarylys jumysyn júrgizýge kiristi, dep habarlaıdy QazAqparat.

Vedomstvoda atap ótkendeı, kóktemgi sý tasqyny qarsańynda ózenderdegi muzdy qopsytý, ótken jyldardyń tájirıbesi boıynsha, eldi mekenderdiń mańyndaǵy jaǵalaý aýmaqtarynyń sý basýyna jol bermeýde tıimdiligin kórsetti.

«Qarasý aýdanynyń Qarasý ózeninde birden 2 jarylys boldy. Alǵashqy jarylysty brıgada Belozerka aýylynan 3 shaqyrym jerde platınanyń aldynda jasady. Ekinshisi - Zelenovka aýylynan 300 metr qashyqtyqtaǵy avtomobıl kópiriniń aldynda oryn aldy. Bul rette 140 uńǵyma burǵylandy. Muzdy qopsytý boıynsha oryndalǵan jumystardyń jalpy kólemi jeti tekshe metrden asty, jarylý oryndaryndaǵy muz jabynynyń qalyńdyǵy 90-nan 110 sm-ge deıin» dep habarlady tótenshe jaǵdaılar departamenti.

Jangeldın aýdanynyń aýmaǵynda, Oshaǵandy aýylynyń mańyndaǵy Qaramyrza kentiniń janyndaǵy Túńtúgir ózeninde jarylys jumystary júrgizildi.

Jarylys orny kezdeısoq tańdalmady. Ótken jyldyń sáýir aıynda munda ondaǵan turǵyn úılerdi sý basyp qalǵan bolatyn.

Departament atap ótkendeı, jarylys jumystaryn uıymdastyrý aldynda jarylys alańy men muzdyń qalyńdyǵyn eskere otyryp, muqııat daıyndyq júrgizilgen.

Jarylystyń tıimdiligi úshin vedomstvo mamandary uńǵymalar arasyndaǵy qashyqtyqty jáne qajetti jarylǵysh zattardyń sanyn eskerdi.