Qostanaı oblysynyń shalǵaı aýyldaryna aýyz sý qubyry júrgiziledi
Aımaq basshysy Oktıabrskoe jáne Jeleznodorojnoe aýyldarynyń sý qubyrlarynyń qurylysyn tekserdi. Atalmysh eldi mekenderdegi sý máselesi jurtshylyq arasynda kóbirek talqylanǵan bolatyn. Qazir bul aýyldardaǵy túıtkildi máselelerdi sheshý úshin «Jumyspen qamtýdyń jol kartasy» baǵdarlamasy aıasynda eki joba qolǵa alyndy.
«Oktıabrskoe aýylyndaǵy sý qubyry qurylysynyń aıaqtalý merzimi 2021 jylǵy maýsym aıyna belgilendi. Jobanyń quny 388,9 mln teńge. Jeleznodorojnoe aýylyna jeltoqsan aıynda sapaly aýyz sý beriledi. Bul maqsatta 255,2 mln teńge jumsalady. Oblys ákimi Qarasý-Vostok sý qubyry jelileriniń qurylys barysymen de tanysty. Bul jobaǵa 1 mlrd 897 mln teńge baǵyttalǵan. «Óńirlerdi damytý» baǵdarlamasy aıasynda júzege asyrylýda. Qurylys 2022 jyldyń tamyz aıynda aıaqtalady», - deıdi oblys ákiminiń baspasóz hatshysy Saıat Júsipov.
Arhımed Muhambetov Jeleznodorojnoe aýylyndaǵy «Trıýmf» sport keshenine bardy. Sport kesheniniń qurylysy «Jeleznodorojnoe AMF» JShS qarajaty esebinen júzege asyryldy.
Ákim sapary Qarasý aýylynda jalǵasty. Bul aýylda 320 oryndyq qazaq mektebi salynyp jatyr. Mektep qurylysyna 1,2 mlrd teńge bólingen. Jańa mektep jyl aıaǵyna deıin paıdalanýǵa berilmek.
Arhımed Muhambetov Qarasý - Bolshaıa Chýrakovka avtomobıl joly ýchaskesiniń jóndelip jatqan aýmaǵyna bardy. Quny 964,1 mln teńge oblystyq mańyzy bar avtomobıl joly ortasha jóndeýden ótedi.
Sapar qorytyndysynda oblys basshysy Qarasý aýdany ákimi V.Radchenkoǵa josparlanǵan jobalardyń iske asyrylýyn baqylaýda ustaýdy tapsyrdy.