Qostanaı oblysynyń perımetri boıynsha 14 blokpost qoıyldy
Qostanaı oblysynda Tótenshe jaǵdaı rejımi jarııalanǵannan beri kólik qozǵalysyna shekteý engizildi. Eldi mekender arasyndaǵy avtobýs qatynasy tolyq toqtatyldy. Tek arnaıy qyzmet kólikteri men taýar tasymaldaýshylardyń qozǵalysyna ruqsat bar. Onyń ózinde kólik ishinde eki adam ǵana bolýy shart.
Senbi kúni jýrnalıstermen brıfıng ótkizgen Qostanaı oblysynyń komendanty Qaırat Dúısembekov osy talaptardy buzǵandarǵa qatań shara qoldanylatynyn eskertti.
Tótenshe jaǵdaı engizilgennen beri zańsyz is-áreketteri úshin oblysta 650-den astam adam ustalǵan. 220 adamǵa qatysty is ákimshilik sotqa jiberildi. Olardyń barlyǵy 5-ten 15 táýlikke deıin qamaýǵa alynady.
Odan bólek, Qylmystyq kodekstiń «Ǵımarat, nysandarǵa shabýyl jasap, basyp alý» baby boıynsha tergeý júrgizilip jatyr.
«Zańsyz narazylyq aktsııasy kezinde Qostanaı qalasynyń ortalyǵyndaǵy oblystyq ákimdik ǵımaratyna basyp kirýge talpynǵandardyń is-áreketi tolyq qujattandyrylǵan. Qajetti tergeý amaldary júrgizilgennen keıin ol adamdardyń barlyǵy qylmystyq jaýapkershilikke tartylady. Zań boıynsha ondaı qylmysqa barǵandarǵa dúnıe-múlkin tárkileý, 7 jyldan 12 jylǵa deıin bas bostandyǵynan aıyrý jazasy qarastyrylǵan», - dedi Qostanaı oblysynyń komendanty Qaırat Dúısembekov.