Qostanaı oblysynyń kólik ınfraqurylymyn damytýǵa 35 mlrd teńge jumsalmaq

QOSTANAI. QazAqparat – Qostanaı oblysynda kólik ınfraqurylymyn odan ári damytýǵa 35,5 mlrd teńge kózdelgen. Bul jaıynda oblystyq máslıhat sessııasynda belgili boldy, dep habarlaıdy QazAqparat tilshisi.

Qostanaı oblysynyń ákimi Arhımed Muhambetovtiń aıtýynsha, bul qarajatqa óńirlik mańyzy bar 316 shaqyrym avtomobıl jolyna da jóndeý kózdelip otyr. Sonymen qatar eldi mekenderdegi kóshelerdiń 364 ýchaskesinde jóndeý jumystary júrgiziledi. Oǵan 7,6 mlrd teńge jumsaý josparlanǵan.

«Bıyl «Nurly jol» memlekettik baǵdarlamasy aıasynda 11,6 mlrd teńgege 17 jobany júzege asyrý josparlanǵan. Uzaqtyǵy 221 shaqyrymdy quraıdy. Atalǵan jobalardyń 14in bıyl aıaqtaý josparlanǵan. Jalpy 17 nysanda da qurylys-montajdaý jumystary júrgizilip jatyr. Qostanaıǵa kire beristegi avtomobıl jolyndaǵy qúny 4,4 mlrd teńge bolatyn kópir qurylysyna erekshe toqtalǵym keledi. Bul nysannyń áleýmettik mańyzy bar. Kóktemgi sý tasqyny kezinde Tobyl ózenimen apatsyz arly-berli ótýdi qamtamasyz etý jáne kópirgen qoıylatyn tehnıkalyq sıpattamany 2-shi tehnıkalyq sanatqa deıin jetkizý negizgi maqsat. Onyń ústine sońǵy ýaqytta Tobyl qalasynda qurylys jumystarynyń qarqyn alýyna baılanysty atalǵan kópirmen ótetin kólik qozǵalysy da artyp otyr. Bıyl jobany júzege asyrýǵa 2,7 mlrd teńge bólindi. Jobany osy jyldyń sońyna deıin aıaqtaý josparlanǵan», - dedi oblys basshysy.

Aıta keterligi, kózdelgen josparlardy júzege asyrýdyń nátıjesinde óńirdegi qanaǵattanarlyq joldardyń úlesi 78 paıyzǵa jetpek.