Qostanaı oblysynyń 29 aýylyna aýyz sý tartylady

QOSTANAI.QazAqparat – Qostanaı oblysynyń shalǵaı aýyldaryna aýyz sý jelileri júrgiziledi, dep habarlaıdy QazAqparat oblys ákiminiń baspasóz qyzmetine silteme jasap.

Bıyl «Nurly jer» jáne «Jumyspen qamtýdyń jol kartasy» baǵdarlamalary sheńberinde sýmen jabdyqtaý jáne káriz qubyrlaryn ótkizý boıynsha 57 joba josparlanǵan.

«37 arnaıy joba «Nurly jer» arqyly, 20-sy «Jumyspen qamtýdyń jol kartasy» baǵdarlamasy aıasynda júzege asyrylady. Búginde qurylys-montaj jumystaryn júrgizýge bıýdjetten bólingen 15,2 mlrd teńge ıgerilýde. Bıyl 31 myńnan astam turǵyny bar 29 aýyl sapaly aýyz sýmen qamtamasyz etiledi. Sondaı-aq 5 qalada sý qubyry jelileri men káriz júıeleriniń tozǵan toraptary jóndeletin bolady. Eldi mekenderdi aýyz sýmen jabdyqtaýǵa baılanysty taǵy 26 joba 2021 jyly júzege asyrylady», - delingen ákimdiktiń aqparatynda.

Oblysta aldaǵy eki jyl ishinde 72 myńnan astam turǵyny bar 67 aýyl sapaly aýyz sýmen qamtamasyz etilmek.