Qostanaı oblysynyń 199 aýyly derbes bıýdjetke kóshti

QOSTANAI. QazAqparat – Qostanaı oblysynyń 199 aýyly derbes bıýdjetke kóshti. Bul týraly oblys ákimi Arhımed Muhambetov «Instagram» paraqshasynda jazdy, dep habarlaıdy QazAqparat.

Oblys basshysy búgin qalalar men aýdandardyń ákimderimen selektorlyq keńes ótkizdi. Jıynda jergilikti ózin-ózi basqarýdyń problemalary men 2020 jylǵa arnalǵan áleýmettik-ekonomıkalyq damý boljamdary talqyǵa tústi.

QR Bıýdjet kodeksine sáıkes jergilikti ózin-ózi basqarýdyń derbes bıýdjetin engizý kezeń-kezeńimen júzege asyrylyp keledi. Búginde oblystyń 199 aýyldyq okrýgi derbes bıýdjetke kóshken. Ol aýyldarda memleket baǵdarlamalar keshendi túrde iske asyrylýda.

«2019 jylǵa arnalǵan Memlekettik mıkronesıe berý baǵdarlamalary aıasynda oblystyń aýyldyq okrýgteriniń kásipkerlerinen 495 ótinish kelip tústi. «Aýyl-El besigi» baǵdarlamasy aıasynda Áýlıekól, Meńdiqara, Qarasý, Fedorov jáne Sarykól aýdandarynyń bıýdjetinen aýyldyq eldi mekenderdi damytý boıynsha 34 jobany iske asyrýǵa qarajat bólindi», - dep jazdy aımaq basshysy.

Sondaı-aq Arhımed Muhambetov selektor barysynda Qostanaı oblysynda Volonterler jylynyń ótýi týraly baıandama tyńdady.

«2020 jyldy QR Prezıdenti Q. K. Toqaev Volonterlar jyly dep jarııalaǵany belgili. Bekitilgen respýblıkalyq is-sharalar josparyna sáıkes barlyq volonterlik jobalar 7 baǵytta biriktiriledi. Bizdiń aımaq «Taza Álem» baǵytyndaǵy eriktilerdiń qyzmetin qorshaǵan ortany qorǵaý, ózender men ormandardy tazartý, aǵash otyrǵyzý, qoqysty suryptaýǵa úıretý bolyp sanalady. 15 myń adamdy biriktiretin 80-ge jýyq eriktiler uıymy jumys isteıdi», - deıdi oblys basshysy.

Keńes qorytyndysy boıynsha ol qala jáne aýdan ákimderine bıýdjettiń ýaqytyly oryndalýyn qamtamasyz etýdi, sondaı-aq jaýapty memlekettik organdarǵa «Volonterler jyly» is-sharalar josparyn júzege asyrý boıynsha jumysty kúsheıtýdi tapsyrdy.