Qostanaı oblysyndaǵy sý qoımasynan ýchaskelik polıtseıdiń denesi tabyldy

QOSTANAI. QazAqparat - Aýdandyq polıtsııa bóliminiń ýchaskelik ınspektory reıdke ketip, sodan baılanysqa shyqpaı qalǵan edi. Onyń denesi sý qoımasyna batyp ketken qyzmettik kólikten tabyldy, dep habarlaıdy QazAqparat tilshisi.

«Qostanaı oblysynyń Áýlıekól polıtsııa bóliminiń ýchaskelik ınspektory 28 sáýir kúni bekitilgen ýchaskede reıdtik jedel-aldyn alý is-sharalaryn júrgizgen bolatyn. Alaıda, ol bir ýaqytta baılanysqa shyqpaı qaldy. Birden izdeý sharalary bastalyp ketti. Jergilikti aımaqty tekserý kezinde sý qoımasyna batyp ketken avtokólik tabyldy, polıtseıdiń denesi sonyń salonynan shyqty. Onda kórinetin dene jaraqattary joq «, - dep túsindirdi oblystyq polıtsııa departamentiniń baspasóz qyzmeti.

Qazirgi ýaqytta atalǵan derek boıynsha sotqa deıingi tergeý jáne qyzmettik tekserý bastaldy.