Qostanaı oblysyndaǵy órtten zardap shekken barlyq otbasyna 1 mln teńgeden beriledi

QOSTANAI. QazAqparat – Qostanaı oblysynda bolǵan órtten zardap shekken otbasylarǵa 1 mln teńgeden beriledi. Bul týraly Qostanaı oblysynyń ákimi Arhımed Muhambetov jelidegi paraqshasynda jazdy, dep habarlaıdy QazAqparat.

«Búgin Amanqaraǵaı aýylynda órtten zardap shekken turǵyndarmen kezdestim. Barshańyzǵa belgili, baspanasynan aıyrylǵan turǵyndar úshin 91 úı salý týraly sheshim qabyldandy. Búgingi kúni qurylys-montajdaý jumystarymen 13 merdigerlik uıym aınalysady. Jańa úıler salý orny retinde Áýlıekól aýylyndaǵy jer ýchaskesi anyqtaldy. Áýlıekól aýylynyń josparyna sáıkes, turǵyn úı qurylysyna jalpy aýdany 53 ga jer ýchaskesi bar. Osy ýchaskeden 10 sotyq ýchaskede árqaısysynyń aýdany 100 sh.m. turǵyn úıler salý úshin 12 ga bólindi. Jer ýchaskeleri qajetti ınfraqurylymmen: sý, gaz, elektr energııasymen, sondaı-aq kireberis joldarmen qamtamasyz etiletin bolady.Aıta ketý kerek, jer ýchaskeleri bar jańa úıler órt saldarynan zardap shekken azamattardyń menshik quqyǵyna beriletin bolady. Qurylys jumystary ózimniń jeke baqylaýymmen, sondaı-aq tehnıkalyq jáne avtorlyq qadaǵalaýmen júzege asyrylady. Sondaı-aq úı janýarlarynyń qyrylýyna baılanysty zalal óteletin bolady», - dep jazdy ákim.

Sondaı-aq ol aýyl sharýashylyǵy janýarlary boıynsha zalaldy óteý Áýlıekól aýdanynyń ákimdigine júgingen kezde jergilikti bıýdjet jáne «Qaıyrymdylyq KZ» qoǵamdyq qory qarajaty esebinen júzege asyrylatynyn jetkizdi.

«Halyqtan basqa 14 kásipkerlik sýbektisi de zardap shekti. Barlyq zardap shekken nysandar boıynsha kásipkerlerge keltirilgen zalaldy óteý boıynsha jumystar júrgizilýde. Zalaldardy óteý shyǵyndy baǵalaǵannan keıin jáne kásipkerdiń tıisti rastaıtyn qujattary bolǵan jaǵdaıda ǵana júrgiziletinin atap ótemin. Órt kezinde zardap shekkenderge kómek kórsetý úshin oblysta «Qaıyrymdylyq KZ» biryńǵaı qoǵamdyq qory jumys isteıdi. Qor qarajatynan barlyq zardap shekken otbasylarǵa 1 mln teńgeden tóleý týraly sheshim qabyldandy. Qujattary tolyq kólemde usynylǵan alǵashqy 24 adam 1 mln. teńgeden kart-shottarǵa ıe boldy. Sonymen qatar, Áýlıekól aýdanyna elimizdiń iri bıznes ókilderi demeýshilik kómek kórsetti», - dep tolyqtyrdy ol.