Qostanaı oblysyndaǵy órtten 18 kásipkerdiń bıznesi shyǵynǵa ushyrady

QOSTANAI. QazAqparat – Áýlıekól aýdanynda órt saldarynan 11 kásipkerdiń bıznesine 198,8 mln teńge shyǵyn keldi, dep habarlaıdy QazAqparat tilshisi.

Al jalpy zardap shekken 18 bıznes sýbektisi bar. Qalǵandarynyń janyp ketken múlkiniń quny áli eseptelip jatyr.

Bul týraly óńirlik kásipkerler palatasynyń dırektory Danııar Kúzenbaev málim etti.

«Áýlıekól aýdanynda 18 kásipker shyǵynǵa ushyrady. Olardyń 11-iniń shyǵyny 198 850 000 teńgege baǵalandy. Qalǵandary boıynsha janyp ketken múliktiń qunyn eseptelip jatyr. Qarasý aýdanynda bir sharýa qojalyǵy órt saldarynan kombaın, traktor jáne aýyl sharýashylyǵy jabdyqtarynan aıyrylǵan. Shyǵyn somasy - 28,8 mln teńge. Múlik pen bıznesten aıyrylǵan kásipkerler úshin qarajat jınaý júrip jatyr. Ol úshin «Atameken» UKP «Kúshimiz birlikte» qorymen birlesip, zardap shekken kásipkerlerge qarjylaı kómek jınap jatyr. Tek 2 kúnniń ishinde qorǵa 12 mln teńge tústi. Onyń ishinde qostanaılyq kásipkerlerden - 6 mln teńge. Qarajat jınaý jalǵasýda», - dep atap ótti Danııar Kúzenbaev.

Qosa ketsek, Ulttyq ekonomıka mınıstri Álibek Qýantyrov órt saldarynan zardap shekken Qostanaı oblysynyń turǵyndaryna rezervten qarajat bólinetinin málimdegen edi.

Sonymen qatar, búgin baspanasy órtenip ketken Áýlıekól aýylynyń turǵyndaryna úı salý jumystary bastaldy.