Qostanaı oblysyndaǵy órt: Zardap shekkenderge 100 sharshy metrden baspana salynady
Tilsiz jalynnan eń kóp zardap shekken eldi mekenniń biri – Amanqaraǵaı aýyly. Jalpy alǵanda, Qostanaı oblysyndaǵy órt 108 nysandy sharpydy. Onyń 91-i – turǵyn úı. Sonyń ishinde Amanqaraǵaı aýylynda – 85, Ozernoe aýylynda 6 baspana zaqymdalǵan.
«Tehnıkalyq zerdeleý qorytyndysy boıynsha turǵyn úıler tolyqtaı janyp ketkendikten qaıta qalpyna keltirýge jatpaıdy. Qazirgi kúnde turǵyn úı qurylysyn júrgizý úshin Áýlıekól aýylynan 2 gektar jer telimi bólindi. Ondaǵy ár 8 sotyq jerge jalpy aýmaǵy 100 sharshy metrdi quraıtyn bir qabatty baspanalar salynady. Osy oraıda aıta keterligi, Áýlıekól aýyly aýdan ortalyǵy bolǵandyqtan eldi mekende ınfraqurylym tolyqtaı júrgizilgen. Aýylda áleýmettik-turmystyq maqsattaǵy nysandardyń barlyǵy bar», - delingen mınıstrlik málimetinde.
Vıtse-mınıstr Erkebulan Daýylbaevtyń aıtýynsha, qurylys jumystaryna tek jergilikti óndirýshilerdiń ónimi qoldanylady.
«Jedel túrde jumysty bastaý týraly tapsyrma qoıylyp otyr. Indýstrııa jáne ınfraqurylymdyq damý mınıstrligi eki aı ishinde qurylys jumystaryn tolyqtaı aıaqtaýdy maqsat etedi. Bul úshin barlyq tıisti sharalar qabyldanyp jatyr. Atalǵan másele mınıstrlik basshysynyń tikeleı baqylaýynda», – dedi ol.
«Qazaq qurylys jáne sáýlet ǵylymı-zertteý jáne jobalaý ınstıtýty» AQ men QR IIDM Qurylys jáne turǵyn úı-kommýnaldyq sharýashylyq isteri komıtetiniń «Memsaraptama» RMK ózderiniń jeke qaıtarymsyz qarajaty esebinen ınjenerlik júıelerdiń jobasyn daıarlaýǵa kirisip ketken. Memlekettik saraptama da ınstıtýttardyń qarjysy esebinen júrgiziledi dep kútilýde.
Aıta keteıik, Memleket basshysynyń tapsyrmasy boıynsha tótenshe jaǵdaıdyn saldaryn joıý maqsatynda qajetti qarajat bólindi. QR Premer-Mınıstri ótkizgen otyrysta Qostanaı oblysynda órtten zardap shekken turǵyndar úshin jedel arada baspana salý boıynsha tapsyrma berildi. Qazirgi kúnde QR IIDM kólik qatynasyn qalpyna keltirý boıynsha jumystar júrgizip, barlyq ınfraqurylymdyq nysandardyń úzdiksiz jumys isteýin qamtamasyz etý boıynsha tıisti sharalardy iske asyrýda.