Qostanaı oblysyndaǵy órt: Qoǵamdyq qorǵa 491,6 mln teńge jınaldy

QOSTANAI. QazAqparat - Órtten zardap shekken qostanaılyqtarǵa kómek berýge arnalǵan biryńǵaı qoǵamdyq qorǵa 491,6 mln teńge jınaldy. Bul týraly Qostanaı oblysynyń Óńirlik kommýnıkatsııalar qyzmetinde ótken brıfıngide qor ókili Batyrbek Ahmetov aıtty, dep habarlaıdy QazAqparat tilshisi.

«Búgingi tańerteńgi aqparat boıynsha qorǵa 491 614 000 teńge tústi. Onyń ishinde iri kólemdegi qarajat aýdarǵan kásiporyndar bar. Máselen, «SaryarkaAvtoProm» JShS – 70 mln, «PetroRetail» JShS – 50 mln jáne «Arıp-Agro» JShS 5 mln teńge aýdardy», - dedi «Qaıyrymdylyq KZ» qorynyń ókili Batyrbek Ahmetov.

Onyń aıtýynsha, qurylǵan arnaıy komıssııa turǵyndardyń shyǵynan esepteıdi. Keıin sol derekterge sáıkes, zardap shekken halyqqa qarajat beriledi.

Qordyń taǵy bir ókili Gúlmıra Amageldiqyzy qajettilikter ótelgennen keıin artylatyn aqsha aýdandy kógaldandyrýǵa baǵyttalatynyn aıtty.

«Jınalǵan aqshanyń basym bóligi órtenip ketken múliktiń ornyn toltyrýǵa jáne Áýlıekól aýylyndaǵy ınfraqurylymdy qalpyna keltirýge baǵyttalady. Eger aqsha artylyp jatsa, onda ol qarjy aýdandy kógaldandyrý jumystaryna bólinedi», - dep atap ótti Gúlmıra Amageldiqyzy.

Eske salaıyq, Qostanaı oblysynyń Áýlıekól aýdanynda orman órti 2 qyrkúıek kúni bastaldy. Barlyǵy 2091 adam evakýatsııalanyp, 12 turǵyn jaraqat aldy. Bir adam kóz jumdy.

Qostanaı oblysynda Ahmet Baıtursynulynyń 150 jyldyq mereıtoıyna oraılastyrylǵan saltanatty sharalar keıinge shegerildi. Óńirge Prezıdent Q.Toqaev bardy. Órt bolǵan eldi meken turǵyndarymen kezdesken Memleket basshysy zardap shegýshilerge Úkimet eki aıda burynǵydan da jaqsy úı salyp beretinin aıtty.

QR Tótenshe jaǵdaılar mınıstri ıÝrıı Ilın órt adam qolynan boldy degen nusqany joqqa shyǵarmaıtynyn málim etti.

Sońǵy málimet boıynsha, órt saldarynan 18 kásipkerdiń bıznesine shyǵyn keldi.

QR Aýyl sharýashylyǵy mınıstrligi jalynnan egistikterge zalal kelse, shyǵyn óteletinin málimdedi.