Qostanaı oblysyndaǵy Qaramyrza aýylynda birqatar úılerdi sý basty

QOSTANAI. QazAqparat – Úılerdi sý basý jaǵdaıy Qostanaı oblysynyń Qarasý aýdanyndaǵy Qaramyrza aýylynda oryn alǵan. Adamdar qaýipsiz jerge shyǵaryldy, qutqarýshylar men jergilikti atqarýshy organdar úılerdegi sýdy sorǵymen tartyp aldy, dep habarlaıdy QazAqparat Qostanaı oblysy Tótenshe jaǵdaılar departamentine silteme jasap.

Vedomstvonyń atap ótýinshe, kóktemgi sý tasqynyna qatysty jaǵdaı búginde turaqty jáne únemi baqylaý ústinde.

«Ortasha táýliktik temperatýralardyń kúrt ósýi men qardyń mol erýi saldarynan Qostanaı oblysynyń ortalyq jáne soltústik bóligindegi ózender men sý qoımalarynda sý deńgeıi kóterilip jatyr. Kóktemgi tasqyn jalǵasyp, ózender muzdan qarqyndy tazarý ústinde. Qazirgi kezde oblys boıynsha qar basqan jerdiń aýmaǵy 6 paıyzdan az», - dep aqparattandyrdy vedomstvoda.

Alaıda 13 sáýir kúni qardyń qarqyndy erýi men erigen qar sýynyń kóbeıýinen Túntigir ózeni arnasynan asqan.

«Qarasý aýdanyndaǵy Qaramyrza aýylynda 39 turǵyn úıdi sý basty, ondaǵy sý 30 santımetrge deıin kóterildi. Tótenshe jaǵdaılar departamentiniń jergilikti atqarýshy organdarmen birlesken kúshimen zardap shekken turǵyndardy evakýatsııalaý uıymdastyryldy. Sý basqan orynnan evakýatsııalaý pýnkterine 69 adam jetkizildi, olardyń bir bóligi týystarynyń úılerine jaıǵastyryldy. 334 iri qara jáne usaq mal qaýipsiz jerge aıdaldy. Qaza tapqandar men zardap shekkender joq», - dep túsindirdi TJD-dan.

Sonymen birge, jergilikti tótenshe jaǵdaılar departamenti, atqarýshy organdardyń kúshteri táýlik boıy sý basqan úılerden sýdy sorǵylaý jumystaryn júrgizdi.

«Sý basqan 39 turǵyn úıden sý tolyq sorylyp alynǵan. Qazirgi kezde barlyq turǵyndar úılerine oraldy, Qaramyrza aýylynyń aýmaǵynda sý basqan úıler joq», - dep sendirdi departamentten.

Jalpy alǵanda, oblys boıynsha tasqyn qaýpi joǵary ýchaskelerde táýlik boıy kezekshilik júrgizý jalǵastyrylyp keledi. Tótenshe jaǵdaılar departamentiniń kúsh-quraldary joǵary ázirlik jaǵdaıynda.