Qostanaı oblysyndaǵy «Qara búrkit» kolonııasynyń janynda órt shyqty

QOSTANAI. QazAqparat – Qostanaı oblysynda «Qara búrkit» kolonııasynyń janynda qatty ystyq aýa raıyna baılanysty qurǵaq shóp órtendi, dep habarlaıdy QazAqparat Qostanaı oblysy boıynsha qylmystyq-atqarý júıesi departamentiniń baspasóz qyzmetine silteme jasap.

Vedomstvonyń habarlaýynsha, órtti qyzmetkerler baıqap, birden sóndirýge kirisken. Tórt saǵattyń ishinde órt tolyq oqshaýlanyp, kolonııanyń jeke quramy órt sóndirý avtokóligindegi sý qoryn tez toltyryp otyrýǵa kómektesti.

«Ashyq jalyn azyq-túlik qoımasyna qaraı ótip ketpes úshin mekeme basshylyǵy TJD qyzmetkerlerine kómek kórsetý týraly sheshim qabyldady. Kezekshi aýysymdaǵy barlyq kúshti jumyldyrdyq», - dedi ÝK161-3 mekemesi bastyǵynyń mindetin atqarýshy Ashat Balambaev.

Órt sóndirýshiler kolonııanyń jeke quramyn batyl jáne jedel áreket etkeni úshin alǵys bildirdi.

«Qara búrkit» – (resmı ataýy – ÝK-161/3 mekemesi) Qazaqstannyń Qostanaı oblysyndaǵy tótenshe qaýipsizdik mekemesi, Jetiqara qalasynan 25 shyqyrym jerde ornalasqan. Onda asa aýyr qylmyskerler, atap aıtqanda ómir boıy bas bostandyǵynan aıyrylǵandar jazasyn óteıdi.