Qostanaı oblysyndaǵy eki kisi ólimin ashýǵa aýyl turǵyndary kómektesti

QOSTANAI.QazAqparat - Qostanaı oblysy kentinde aýyl turǵyndary quqyq qorǵaý qyzmetkerlerine asa aýyr qylmysty ashýǵa kómektesti, dep habarlaıdy QazAqparat tilshisi.

Oblystyq ishki ister departamentiniń basshysy Erlan Omarbekov áleýmettik jelidegi jeke paraqshasynda Qostanaı oblysy polıtseıleriniń Sarykól aýylynda asa aýyr qylmys – eki adamdy óltirý qylmysyn ashqanyn habarlady.

«19 naýryzda Sarykól kentinde aýyl turǵyny jekemenshik turǵyn úıden 1974 jáne 1965 jylǵy eki er adamnyń zorlyqpen óltirilgen denelerin tapty. Atalǵan fakti boıynsha QR Qylmystyq kodeksi 99-babynyń 2-bólimi («Eki nemese odan da kóp adamdy óltirý») boıynsha sotqa deıingi tergep-tekserý jumystary bastaldy», - dep habarlady oblystyq polıtsııa basqarmasynyń basshysy.

Qylmysty ashý úshin quramyna polıtsııa bóliminiń tájirıbeli qyzmetkerleri kirgen arnaıy tergeý-jedel toby quryldy.

«Tergeý barysynda qylmystyń birneshe nusqasy alǵa tartyldy. Jedel izdestirý sharalary barysynda Sarykól aýylynyń 2001 jylǵy turǵyny qolǵa tústi», - dep tolyqtyrdy ol.

Ustalǵan er adamnyń eki kisini óltirýdegi kinási tergeý áreketteri, alynǵan zattaı aıǵaqtar, sondaı-aq onyń óziniń moıyndaýmen rastalǵany atap ótilgen. Qazirgi ýaqytta kúdikti qamaýǵa alyndy. Qalǵan aqparat QR Qylmystyq-protsestik kodeksiniń 201-babyna sáıkes tergeý múddesi úshin taratylmaıdy.

«Bul qylmysty ashýǵa Sarykól kentiniń turǵyndary úlken kómek kórsetkenin atap ótkim keledi. Belsendi azamattyq ustanym búginde ishki ister organdarynyń jumysyndaǵy jaqsy tirekke aınalýda», - dep túıindedi E.Omarbekov.