Qostanaı oblysyndaǵy aýyldarǵa oqýshylar tasymaldaıtyn avtobýstar satyp alynady
Buǵan deıin habarlaǵanymyzdaı, máslıhattyń kezekti sessııasynda 2019-2021 jyldarǵa arnalǵan oblys bıýdjeti qaıta qaraldy.
Oblystyq ekonomıka jáne bıýdjettik josparlaý basqarmasy basshysynyń orynbasary Janna Shaımardanovanyń sózinshe, óńirde áleýmettik salaǵa qomaqty qarjy bólinedi.
«Óńirde bilim salasyn damytýǵa 2,6 mlrd teńge kózdelip otyr. Bul qarjy Qostanaı qalasyndaǵy Aeroport, ıÝbıleınyı shaǵyn aýdandaryndaǵy mektepterdiń qurylysyn jalǵastyrýǵa, Amanqaraǵaı aýylynda jańa bilim oshaǵyn salýǵa jumsalady. 150 mln teńge úsh nysannyń kúrdeli jóndeýine baǵyttalady. Olar: Qarabalyq aýdanynyń Boskól orta mektebi, Qamysty aýdanyndaǵy Altynsarın atyndaǵy orta mektebi jáne Qostanaı aýdanyndaǵy orta mektep. 32,2 mln teńge Qostanaıda úsh jataqhananyń jobalyq-smetalyq qujatyn daıyndaýǵa, 100 mln teńge aýyldyq jerlerdegi oqýshylardy tasymaldaıtyn avtobýstar satyp alýǵa, 84,7 mln teńge JOO tehnıkalyq jáne pedagogıkalyq mamandyqtardy jetildirýge bólingeli otyr. Al densaýlyq saqtaý salasynyń kúrmeýli máselelerin sheshýge 2,3 mlrd teńge, sporttyq nysandardyń qurylysyn aıaqtaýǵa 100 mln teńge baǵyttalady», - dedi Janna Shaımardanova.
Jıynda málim bolǵandaı, Qostanaıda turǵyn úı qurylysy qarqynyn toqtatpaıdy. Máselen, Aeroport shaǵyn aýdanynda 12 nesıelik baspana qurylysyna 4,3 mlrd, ınjenerlik-kommýnıkatsııalyq jeliler tartýǵa 80 mln teńge quıylady. Al ıÝbıleınyı shaǵyn aýdanynda 2,1 mlrd teńgege 4 turǵyn úı salynady. Qonaı eldi mekenindegi, Qostanaı aýdanynyń «Astana-Báıterek» móltek aýdanyndaǵy jáne Lısakov qalasyndaǵy turǵyn úı qurylystaryn da keler jyly aıaqtaý josparda bar.
Shalǵaı eldi mekenderge sý tartý sharýasyna 7,6 mlrd teńge jumsalady. Osy qarjynyń kómegimen Amangeldi, Esir, Amanqaraǵaı, Torǵaı, Antonov, Zabelov, Chelgashy, Zlatoýst, Novoılınov eldi mekenderinde aýyzsý máselesi sheshilmek. Munyń syrtynda, jol jóndeý jumystaryna 917,4 mln teńge salynady.
Oblysta gaz tartý jumystarynyń da tabysty júzege asyp jatqany málim. Bul baǵyttaǵy jobalar keler jyly da jalǵasyn tapqaly otyr. Atap aıtqanda, Áýlıekól, Fedorov, Nekrasov, Pereleskı, Sılantev eldi mekenderin kógildir otynmen qamtýǵa 1,3 mlrd teńge bólinbek. Al 34 mln teńgeden astam qarjy Arqalyq qalasynyń jylý-energetıkalyq ortalyǵynyń, Lısakov qalasynyń Oktıabr aýylyndaǵy gaz qazandyǵynyń jóndeý jumystaryna baǵyttalady.
«Biz barlyq salany tıisti qarjymen qamtyp otyrmyz. Muny barlyǵyńyz kórip, bilip otyrsyzdar. Ústimizdegi jyly da bólingen qarajat jektilikti ıgerildi. Endi bıýdjettik josparlardyń syrtynda, mınıstrliktermen baılanys ornatyp, taǵy da qosymsha qarjy tartý tetikterin qarastyratyn bolamyz. Esesine jumys kóbeıedi. Sony eskerińizder», - dep túıindedi oblys ákimi Arhımed Muhambetov.