Qostanaı oblysyndaǵy aýdanǵa Beıimbet Maılınniń esimi berilýi múmkin
Konferentsııaǵa Qostanaı, Astana, Almaty, Pavlodar qalalarynyń tarıhshy, fılolog ǵalymdary men mamandary qatysty. Onomastıka salasyndaǵy ǵylymı-pratıkalyq máseleler jóninde baıandamalar jasalyp, pikir-oılar ortaǵa salyndy
Fılologııa ǵylymdarynyń kandıdaty, elordalyq maman Jazıra Aǵabekovanyń aıtýynsha, «Rýhanı jańǵyrý» baǵdarlamasyn júzege asyrýdaǵy ózekti másele - burmalanǵan, umyt qalǵan qazaqy ataýlardy qalpyna keltirý, tiriltý, sol arqyly tól tanymymyzdy oıatyp, qoǵamdyq sanany jańǵyrtý.
«Latyn qarpine kóshýge bel býǵan ult eń áýeli osy máseleni retke keltirip alýy kerek. Bizge sińisti bolyp ketken onomastıka kırıll qarpimen jasalǵandyqtan, birizdilikten ajyrap qalǵanymyz endi esimizge túsip jatqan sııaqty. Qazaqy ataýlardyń úndik ózgeriske ushyraýynan da bárimiz kóre tura kónip júrgen qatelikter kóp. Bul damyǵan memleketterdegideı elimizde onomastıkalyq zańdy nusqaýlyqtardyń áli qalyptaspaǵanyn ańǵartady», - dedi ol.
Al, ýnıversıtet professory Qalqaman Jaqyp onomastıkanyń jer men el tutastyǵynyń kepili ekenine toqtaldy. Ol konferentsııa saıyn burqyrap aıtylyp jatatyn usynystyń eshqaısysy joǵarǵy jaqqa jetip, qaraýǵa alynyp, sheshimin taba bermeıtinin de synǵa aldy.
Respýblıkalyq mamandar jer-sý ataýlaryn jańǵyrtý turǵysynda ilgerileýshilik baıqalǵanymen, Qostanaı oblysynyń áli de kenjelep turǵanyn jasyrmady.
Konferentsııa barysynda Ahańnyń 145 jyldyǵyna oraı Aqkól aýylyna ult kóseminiń esimi berilgeni, Beıimbet Maılınniń 125 jyldyǵyna oraı Taran aýdanyna atyn berý, Jeńis kúni qarsańynda oblys ortalyǵyndaǵy kóshelerdiń birin UOS ardageri qostanaılyq Estaı Eşanovtyń esimimen ataý usynystary qaralyp jatqany jarııa etildi.