Qostanaı oblysynda jyl basynan beri 130-dan astam órt tirkeldi

QOSTANAI. QazAqparat – Jyl basynan beri óńirde 14 adam órt qurbany boldy, barlyǵy 130-dan asa órt oqıǵasy tirkelgen, dep habarlaıdy QazAqparat Qostanaı oblysynyń TJD-ǵa silteme jasap.

«Oblysta jyl basynan beri 135 órt oqıǵasy tirkelgen. Aldyńǵy jyly osy ýaqytta 128 órt tirkelgen. Osylaısha, ósim 5%-dy kórsetti. Órt saldarynan 14 adam qaza tapqan, aldyńǵy jyly qurbandar sany 11 bolǵan, ósim – 27%», - dep málimdedi vedomstvodan.

Órt kóbinese jeke úı sektorynda kóp shyǵady. Bundaı 98 oqıǵa tirkelgen. Jylý berý maýsymynda jeke sektorda órt jáne gazdan ýlaný qateri arta túsedi.

Órt qaýipsizdigi erejesiniń saqtalýyna azamattar asa mán bermeıdi. Sol sebepti kóp jaǵdaıda órt túrli elektr jabdyǵyn jáne elektr jelisin paıdalaný erejesin saqtamaý, elektr jylytý qurylǵysynyń aqaýynan bolady.

Sonymen qatar órt jáne onyń zardaptaryn aldyn alý úshin qutqarýshylar peshterdi tekserip, aqaýdy jóndep otyrý kerek ekendigin eskertedi.

«Tútin murjasy, qudyǵy ótetin qabyrǵalardy áktep otyrý kerek. Sonymen qosa pesh pen murjany kúl men kúıeden tazartyp otyrý mańyzdy. Murja men peshti jylý berý maýsymynda tazartyp otyrǵan jón: jylytý peshteri úshin 3 aıda 1 ret, úzdiksiz janatyn peshter men oshaqtar úshin 2 aıda 1 ret», - dedi TJD ókilderi.