Qostanaı oblysynda jol jóndeýge 44 mlrd teńgege jýyq qarjy bólinedi

QOSTANAI. QazAqparat – Qostanaı oblysynda 2025 jylǵa deıin shamamen 2 myń shaqyrym avtojol jóndeledi. Bul týraly oblys ákimi Arhımed Muhambetov turǵyndarǵa esep berý kezdesýinde aıtty, dep habarlaıdy QazAqparat tilshisi.

«Bıyl Qostanaı oblysynda jol jóndeýge 43,7 mlrd teńge baǵyttaý josparlanyp otyr. Onyń ishinde respýblıkalyq joldarǵa – 6,4 mlrd teńge, oblystyq mańyzy bar joldarǵa – 13,9 mlrd teńge, aýdandyq joldarǵa jáne eldi mekenderdegi kóshelerge 23,4 mlrd teńge jumsalady. Búginde 2020-2025 jyldarǵa arnalǵan «Nurly jol» jańa memlekettik baǵdarlamasy bekitildi, onda Memleket basshysynyń oblystyq jáne aýdandyq mańyzy bar, jaqsy jáne qanaǵattanarlyq jaǵdaıdaǵy avtomobıl joldarynyń úlesin 2025 jylǵa qaraı 95%-ke deıin arttyrý jónindegi tapsyrmasyn oryndaý negizgi mindet bolady. Osyǵan baılanysty jyl saıyn joldardy jóndeýge keminde 20 mlrd teńge baǵyttalady jáne osy kezeńde shamamen 2 myń shaqyrym avtojol jóndeledi», - dedi oblys basshysy.

«Aýyl – el besigi» baǵdarlamasy aıasynda 2019 jyly oblysta 19 kóshe kúrdeli jóndeýden ótken. Oǵan 658 mln teńge bólindi. Barlyq jóndeý jumysynyń arqasynda oblystyq jáne aýdandyq mańyzy bar joldar 69%-ǵa jaqsarǵan. Bıyl Amangeldi, Áýlıekól, Beıimbet Maılın, Denısov, Á.Jangeldın, Jitiqara, Qamysty, Qarabalyq, Qarasý, Qostanaı, Meńdiqara, Naýyrzym, Sarykól, Fedorov aýdandarynda, Arqalyq qalasyndaǵy aýdandyq joldardy jóndeý josparlanyp otyr.

Buǵan deıin Arhımed Muhambetov halyqqa esep berý jıyny barysynda aımaqtaǵy turǵyn úı qurylysy týraly baıandady.