Qostanaı oblysynda jer úıde turatyndar qysqa ýaqtyly daıyndalmaıdy - TJD

QOSTANAI. QazAqparat - Qostanaıda jylytý maýsymyna daıyndyq qyzý júrip jatyr, dep habarlaıdy QazAqparat tótenshe jaǵdaılar departamentine silteme jasap.

Qostanaı oblysy TJD memlekettik órt baqylaý basqarmasynyń aǵa ınjeneri, azamattyq qorǵaý leıtenanty Nurhan Qabykenniń aıtýynsha, turǵyn úı sektorynda aldyn alý jumysyn júrgizý úshin jylytý maýsymy qarsańynda 9 745 úıde turatyn 30 908 azamattyń áleýmettik osal toptarynyń tizimi jasalǵan.

Búgingi kúni oblystyq TJD qalalyq jáne aýdandyq bólimsheleriniń qyzmetkerleri osy sanattaǵy turǵyndardyń turǵylyqty jerin 100% aralap shyqty.

Órt qaýipsizdigi talaptaryn buzýdyń 1 190 faktisi anyqtaldy, onyń 143-i ornynda joıyldy.

Bıyl Qamysty jáne Jangeldi aýdandaryndaǵy 9 turǵyn úıge kúrdeli jóndeý júrgizilgen. 165 úıde jylytý peshi jóndeldi, 229 úıde tútin murjasy tazartyldy.

Kópbalaly otbasylardyń, múgedekter men zeınetkerlerdiń úıinde gaz sıgnalızatoryn ornatý jumysy jalǵasyp jatyr.

Vedomstvo ókiliniń aıtýynsha, halyq pesh pen murjany qys túspeı, jyly kezde aldyn ala jóndep almaıdy, sosyn ol turmystyq órtke sebep bolady.

«Órt qaýipsizdigi erejelerin bilý jáne saqtaý jamandyqtyń aldyn alýǵa kómektesedi», - dep atap ótti N. Qabyken.

Aıta keteıik, Qostanaı qalasynda jylytý maýsymy 29 qyrkúıekte birtindep bastalady.