Qostanaı oblysynda jemqorlyqqa qarsy qaýly qabyldandy
Jıyn barysynda bilim salasyndaǵy qoǵamdyq keseldiń aldyn alý joldary men 2019 jyldyń sońyna deıingi jospar tizildi. Jemqorlyqqa qarsy is-qımyl departamentiniń aqparatyna sáıkes, Qostanaı oblysynda sońǵy úsh jylda bilim salasynda 22 qylmys tirkelgen. Onyń basym bóligin bilim berý mekemeleriniń balabaqsha meńgerýshileri men esepshileri jasaǵan.
«Memleket basshysy Qasym-Jomart Toqaevtyń saılaýaldy baǵdarlamasynda jemqorlyqqa qarsy kúresti júıeli túrde júrgizý kerektigi aıtylǵan. Búginde «Nur Otan» partııasy mańyzdy suraqtar men máselelerdi talqylaýǵa arnalǵan alańǵa aınaldy. Memleket pen qoǵam bul keselge qarsy birigip, jumyla kúresýi kerek», - deıdi Qoǵamdyq keńes tóraǵasynyń orynbasary Rashıt Nurmaǵambetov.
Oblystyq bilim basqarmasynyń basshysy Vasılıı Tsymbalıýk óńirdegi kásibı jáne tehnıkalyq bilim berý mekemelerinde jemqorlyqqa qarsy nóldik tózimdilikti qalyptastyrýǵa arnalǵan birqatar is-sharalar qolǵa alynǵandyǵyn aıtty.
«Baǵdarlamany iske asyrý aıasynda oblysta «Adal urpaq» klýbtary paıda boldy. Aımaq boıynsha 414 klýb 12 myńnan astam oqýshyny biriktirip otyr. Odan bólek, arnaıy bilim salasynda memlekettik qyzmet kórsetý túrleriniń avtomatty júıesin ornatý kózdelýde. Ońtaılandyrý sheńberinde 75 mektepte dırektorlar kabıneti 1 qabatqa aýystyryldy. Jemqorlyq máseleleri men suraqtary boıynsha arnaıy «Senim telefony» jumys isteıdi», - deıdi bilim basqarmasynyń basshysy Vasılıı Tsymbalıýk.
Partııa atynan oblystyq máslıhat depýtaty Erkin Ábil joǵary oqý ornyndaǵy jemqorlyqpen kúresýdegi sharalarmen bólisti. Bilim ordasynda dıplomdyq jumystyń jańa ádisi engizilgen. Stýdentter startap jobalar usynyp, ony qorǵaıdy. Bul túlektiń mamandyq boıynsha aldaǵy jumysqa beıimdelip, JOO-da jemqorlyqtyń aldyn alýǵa baǵyttalǵan.
«Júıeli túrde «Taza sessııa» aktsııasy uıymdastyrylady. «Jas Otan» QOF jastar qanatymen birlese stýdentter arasynda saýalnama júrgizildi. Adaldyq akademııalyq lıgasyn qurý jóninde deklaratsııaǵa qol qoıyldy. Bizdiń ýnıversıtet bul bastamaǵa muryndyq boldy. Akademııalyq adaldyqty arttyrý maqsatynda jol kartasy da qabyldandy», - dep atap ótti Erkin Ábil.
«Nur Otan» partııasy QOF tóraǵasynyń birinshi orynbasary Jańabaı Bısımbaev jemqorlyq táýekelderi basym salalarda túsindirý jumystaryn keńinen júrgizý kerektigine toqtaldy.
Jıynǵa qatysýshylar «esepshiler mektebin» qurýdy usyndy. Keńes músheleri bul usynysty biraýyzdan qoldady. Sonymen qatar jemqorlyqqa qarsy kúres boıynsha ortaq jospar qurylady. Otyrystyń qorytyndysy boıynsha JOO ókilderi men memlekettik organdarǵa qoǵamdyq keseldiń aldyn alýǵa baǵyttalǵan ortaq qaýly qabyldady.