Qostanaı oblysynda jedel járdemge suranys eki ese azaıdy

QOSTANAI. QazAqparat – Qostanaı oblysynda jedel járdem shaqyrtýlary azaıdy, dep habarlaıdy QazAqparat oblystyq densaýlyq saqtaý basqarmasynyń baspasóz qyzmetine silteme jasap.

«Shilde aıynyń basynda óńirde jedel járdemge suranys táýligine 1400 shaqyrtýǵa deıin ósken bolatyn. Máselen, 7 shilde kúni 1680 adam jedel járdem qyzmetine júgingen. Epıdemııa beleń alǵannan bergi basqa kúnderi 1100-1300 qońyraýǵa deıin qabyldanǵan. Al karantın bastalǵanǵa deıin ortasha eseppen táýligine nebári 700-760 adam jedel járdem shaqyrtylatyn. Sońǵy kúnderi shaqyrtýlar azaıyp keledi. Búgin nebári 650 qońyraý tústi», - deıdi basqarmanyń baspasóz qyzmetindegiler.

Qostanaı oblystyq jedel medıtsınalyq járdem stantsııasynyń bas dárigeri Irına Shteıgervaldtyń aıtýynsha, shaqyrtýdyń azaıǵany óńirdegi epıdemıologııalyq jaǵdaıdyń ońalyp kele jatqanyn kórsetedi. Alaıda, qazir bosańsyp, shekteý sharalaryna salǵyrt qaraıtyn ýaqyt emes. Osy qarqynmen indetti birtindep jeńýge bolady.

«Shynynda da, bizdiń oblystyń turǵyndarynan COVID-19 vırýsy anyqtalǵan sátten beri jedel járdem qyzmeti úlken júktememen jumys istedi. Jalpy, shaqyrýlardyń ortasha táýliktik sany 1,5 esege artty. Tipti bir kúnderi táýligine 1600 qońyraýǵa deıin jetti. 15 shildeden bastap jedel járdem qyzmetine túsip jatqan qońyraýlar sany orta eseppen táýligine 5%-ǵa tómendep otyr. Máselen, keshe feldsherler 1033 shaqyrtý aldy. Bul 1 shildeden beri tirkelgen eń tómengi kórsetkish boldy. Al búgin 650 ótinish kelip tústi», - deıdi bas dáriger.

Buǵan deıin Qostanaı joǵarǵy medıtsınalyq kolledjiniń 2-3 kýrs stýdentteri aýdandardaǵy emdeý mekemelerinde belsendi jumys istep júrgenin habarlaǵanbyz.